اسلام آباد : سیفران کے وفاقی وزیر عبدالقادر بلوچ کاکہناہے کہ افغان مہاجرین کو پا کستان سے راتوں رات نہیں بجھوایا جائے گا،اکتیس دسمبر 2015 تک افغان مہاجرین کو ملک میں رکھنے کے پابند ہیں۔
اسلام آباد میں نیوز کانفرنس سے خطاب کرتے ہوئے ان کاکہناتھاکہ کسی بھی افغان مہاجر کا کسی بھی دہشت گردی کی کارروائی میں ملوث ہونے سے متعلق کوئی بھی ثبوت نہیں ملا ہے۔
عبدالقادر بلوچ کاکہناتھاکہ افغان مہاجرین کی افغانستان باعزت واپسی کو یقینی بنایا جائے گا،جس کیلئے افغان حکومت یواین ایچ سی آر اور عالمی براداری کے ساتھ رابطے جاری ہیں۔
انھوں نے بتایاکہ پاکستان میں رجسٹر ڈ افغان مہاجرین کی تعداد سولہ لاکھ کے قریب ہے جبکہ اتنی ہی تعدا دمیں بغیر رجسٹریشن کے افغان شہری پاکستان میں رہ رہے ہیں، جنھیں پاکستانی قانون کے مطابق ملک سے نکالا جائے گا۔
عبدلقادر بلوچ نے بتایاکہ افغان مہاجرین کے باعث پاکستان کی معیشت کو 200 ارب ڈالر کا نقصان ہو اہے جبکہ بدلے میں عالمی برداری نے افغان مہاجرین کو بھلا رکھا ہے اور مہاجرین کی فلاح و بہبود کیلئے پاکستان کوسو ارب بھی موصول نہیں ہوئے۔