اسلام آباد: پاکستان نے بھارتی مداخلت کو دنیا کے سامنےلانے کا فیصلہ کرلیا ہے، اقوام متحدہ میں مستقل مندوب ملیحہ لودھی وزیراعظم کی ہدایت لینےکیلئے پاکستان پہنچ گئیں۔
بھارتی خفیہ ایجنسی پاکستان کے مختلف علاقوں میں دہشتگردی میں مصروف ہے، پاکستان نے بھارتی چہرہ اقوام متحدہ میں بے نقاب کرنے کا فیصلہ کرلیا، اقوام متحدہ میں پاکستان کی مستقل مندوب ملیحہ لودھی وزیراعظم کی ہدایت لینے کیلئے پاکستان پہنچ گئیں۔
تجزیہ کار اکرام سہگل نے اے آر وائی نیوز سے خصوصی بات چیت کرتے ہوئے کہا کہ پاکستان میں بھارتی مداخلت کو دنیا کے سامنے لانے کیلئے درست فیصلہ کیا گیا ہے۔
سینئیرسکیورٹی اور دفاعی تجزیہ کار جمشید ایاز کا کہنا ہے کہ پاکستان کو اب بھارت کے مقابلے کیلئے میدان میں آنا چاہئے، کراچی اور کوئٹہ میں دہشتگردی میں بھارتی مداخلت کے ثبوت موجود ہیں، پاکستانی سکیورٹی ایجنسیوں کو ایسے شواہد ملے ہیں کہ پاکستان میں دہشتگردوں کی معاونت کیلئے بھارتی خفیہ ایجنسی را فنڈنگ کر رہی ہے۔
جس پر پاکستان نے معاملہ عالمی دنیا کے سامنے اٹھانے کا فیصلہ کیا ہے، بھارتی وزیرِاعظم نریندرمودی کا مکتی باہنی کی مالی اور عملی مدد کرنے کا برملا اعلان بھی پاکستان میں مداخلت کا منہ بولتا ثبوت ہے۔