کراچی : سندھ میں شدیدگرمی کے ستائے عوام کیلئے پاک فوج اور سندھ رینجرز کی جانب سے ہیٹ اسٹروک سینٹروں نے کام شروع کردیا، سینکڑوں متاثرہ مریض ان سینڑوں سے رجُوع کر رہے ہیں، سندھ میں شدید گرمی کے ستائے عوام کیلئے پاک فوج اور سندھ رینجرز نے کراچی سمیت اندرون سندھ بائیس ہیٹ اسٹروک سینٹر قائم کر دیئے ہیں۔
شدید گرمی سے ہلاکتیں۔ صورتحال پر قابو پانے کیلئے پاک فوج حرکت میں آگئی، آئی ایس پی آر کے مطابق پاک آرمی اور سندھ رینجرز نے عوام کی سہولت کیلئے کراچی میں چودہ ہیٹ اسٹروک سینٹر قائم کئے گئے ہیں، دس سینٹرز رینجرز جبکہ چار پاک آرمی کے زیرِانتظام قائم کئے گئے ہیں۔
ہیٹ اسٹروک سینٹر میں بڑی تعداد میں گرمی سے متاثرہ افراد کی آمد کا سلسلہ جاری ہے، جہاں انہیں طبی امداد دی جارہی ہے۔
سی ایم ایچ حیدرآباد میں دو، پنوعاقل سکھر میں دو، سی ایم ایچ چھور ، جامشورو ، سی ایم ایچ بدین اور ایم آئی روم سیہون شریف میں ایک ایک ہیٹ اسٹروک سینٹر قائم کیا گیا ہے۔
کراچی میں پاک فوج نے جناح، عباسی اور سول اسپتال کو ہیٹ اسٹروک کی ادویات بطور عطیہ فراہم کیں، ان سینٹرز پر ڈاکٹرز، پیرامیڈیکل اسٹاف اور ادوایات کا مکمل انتظام کیا گیا ہے۔
ہیٹ اسٹروکس سینیٹرز کیلئے نیشنل ڈیزاسٹر مینیجمنٹ نے کور کمانڈر کراچی سے مدد کی درخواست کی تھی۔