کراچی: ڈی ایس پی مجید عباسی نامعلوم افراد کی جانب سے کئے گئے قاتلانہ حملے میں زخموں کی تاب نہ لاتے ہوئے جاں بحق ہوگئے۔
تفصیلات کے مطابق منگل کے روز سائٹ ٹاؤن کے ڈی ایس پی مجید عباسی شاہ لطیف ٹاؤن سے متصل علاقے ظفر ٹاؤن میں واقع اپنے گھر سے دفتر کی جانب گامزن تھے کہ نامعلوم افراد نے ان کی گاڑی پراندھا دھند فائرنگ کردی۔
فائرنگ کے نتیجے میں ڈی ایس پی مجید عباسی کو کئی گولیاں لگیں جن کے سبب وہ شدید زخمی ہوگئے۔
مجید عباسی کو انتہائی نازک حالت میں جناح اسپتال منتقل کیا گیا جہاں وہ زخموں کی تاب نہ لاتے ہوئے دم توڑ گئے۔
جناح اسپتال کی ایم ایل اوڈاکٹرسیمی جمالی نے اے آر وائی نیوز کو ڈی ایس پی مجید نظامی کی موت کی تصدیق کی ہے اور بتایا ہے کہ ان کا پوسٹ مارٹم کچھ دیر میں کیا جائے گا۔
واضح رہے کہ گزشتہ ماہ کی 10 تاریخ کو بھی کراچی کے علاقے گلستانِ جوہر میں ڈی ایس پی ذوالفقارزیدی قاتلانہ حملے میں جاں بحق ہوگئے تھے۔
پولیس افسران کی بڑی تعداد جناح اسپتال پہنچ چکی ہے اور واقعے کے ذمہ داروں کو فی الفور گرفتار کرنے کے احکاما ت جاری کردئے گئے ہیں۔
ذرائع کا کہنا ہے کہ ڈی ایس پی مجید عباسی اپنے علاقے میں جرائم پیشہ افراد کی سرکوبی میں انتہائی جانفشانی سے مصروف تھے جس کے سبب انہیں کافی عرصے سے دھمکیاں مل رہی تھیں۔