کراچی : ڈی آئی جی ایسٹ عامر فاروقی نے بتایا کہ آرام باغ کے قریب پاک فوج کے میجر کے قتل میں ملوث دو ملزمان کو گرفتار کرلیا جو ڈیلی ویج پر کے پی ٹی میں کام کرتے تھے۔
تفصیلات کے مطابق ڈی آئی جی عامر فاروقی نے پریس کانفرنس کرتےہوئے بتایا ہے کہ شہر قائد کے علاقے آرام باغ میں فائرنگ کے دوران میجر کے قتل میں ملوث دو ملزمان کو گرفتا رکیا گیا ہے۔
ڈی آئی جی ایسٹ کا کہنا تھا کہ گرفتار ملزمان کا تعلق لیاری گینگ وار سے ہے جو اسلحہ بھی لیاری گینگ وار کے کارندوں سے لیتے تھے۔
عامر فاروقی نے پریس کانفرنس کے دوران بتایا کہ گرفتار دونوں ملزمان ڈیلی ویج پر کے پی ٹی میں کام کرتے ہیں جن کا جیو فینسنگ سے ریکارڈ حاصل کیا۔
ڈی آئی جی ایسٹ نے بتایا کہ ملزمان سے واردات میں استعمال ہونے والی موٹر سائیکل برآمد کرلی جبکہ واردات میں استعمال ہونےوالا اسلحہ انہوں نے فائرنگ کے بعد نالے میں پھینک دیا تھا۔
ان کا مزید کہنا تھا کہ ملزمان کو سائٹ سپر ہائی وے سے گرفتارکیاگیا ہے جن کی گرفتاری میں ایس ایچ او فیروزآباد اورنگ زیب خٹک نے انتھک محنت سے شامل ہے جنہوں نے کیس کو حل کیا۔