اسرائیل کی سے جانب سے غزہ پر کی جانے والی بمباری کے نتیجے میں ہزاروں فلسطینی شہید ہوچکے ہیں، ایسے میں ظلم و بربیت کی انتہاء کرتے ہوئے غزہ کے لئے بیرونی امداد کے دروازے بھی بند کردیئے گئے ہیں۔ تاہم اب امریکی صدر کی جانب سے اس حوالے سے لب کشائی کی گئی ہے۔
غیر ملکی ذرائع ابلاغ کے مطابق امریکی صدر نے کہا ہے کہ امدادی سامان کے 20 ٹرکوں پر مشتمل پہلی کھیپ رفح کراسنگ کے ذریعے جنوبی غزہ روانہ کی جائے گی۔
جوبائیڈن کا کہنا تھا کہ کہ مصر کے صدر عبدالفتاح السیسی نے رفح کراسنگ کھولنے کی اجازت انسانی بنیادوں پر دی ہے۔
امریکی صدر نے اسرائیل سے واپسی پر میڈیا سے بات کرتے ہوئے کہا کہ کراسنگ کے آس پاس کی سڑک کو مرمت کی ضرورت ہے اس لئے ممکنہ طور پر جمعے کے روز امدادی ٹرک روانہ ہوسکیں گے، امدادی سامان اقوام متحدہ کے تحت تقسیم کیا جائے گا۔
امریکی صدر نے کہا کہ اگر حماس نے امدای سامان پر قبضہ کیا یا اسے گزرنے نہیں دیا گیا تو امدادی سامان کی ترسیل روک دی جائے گی۔
ان کا کہنا تھا کہ امدادی سامان کی پہلی کھیپ میں انتہائی ضروری سامان بھجوایا جائے گا جبکہ امدادی سامان کی دوسری کھیپ کا فیصلہ حالات کو دیکھ کر کیا جائے گا۔
واضح رہے کہ العہلی عرب اسپتال پر اسرائیلی بمباری سے شہید فلسطینیوں کی تعداد 800 سے تجاوز کرگئی ہے، خوفناک بمباری کے نتیجے میں مرنے والوں میں خواتین، بچے، ڈاکٹرز اور اسٹاف شامل تھا۔