مالدیپ کی حکومت نے بھارتی وزیراعظم نریندر مودی پر تنقید کرنے کی پاداش میں اپنے تین وزرا کو معطل کر دیا ہے۔
غیر ملکی میڈیا کے مطابق مالدیپ کی حکومت نے اپنے تین وزرا مریم شیونا، ملشا شریف اور مہذوم ماجد کو معطل کر دیا ہے جن کا جرم بھارتی وزیراعظم نریندر مودی پر سوشل میڈیا پر تنقید کرنا ہے۔
مالدیپ حکومت کی جانب سے جاری بیان میں کہا گیا ہے کہ مذکورہ وزرا نے حکومتی عہدوں پر رہتے ہوئے سوشل میڈیا پر اس نوعیت کی پوسٹس کیں جس کی بنا کر انہیں ان کے عہدوں سے معطل کیا گیا ہے۔
مالدیپ حکومت نے بھارتی وزیراعظم پر کیے گئے تنقیدی تبصروں کو ان وزرا کی ذاتی رائے قرار دیتے ہوئے کہا ہے کہ ان کی رائے حکومتی موقف کی نمائندگی نہیں کرتی۔
دوسری جانب اپوزیشن جماعتوں نے حکومت پر تنقید کی اور تبصروں میں استعمال ہونے والی زبان کو ’خوفناک‘ قرار دیتے ہوئے کہا کہ آزادی اظہار رائے کے حق کو جمہوری اور ذمے دارانہ انداز میں استعمال کرنا چاہیے۔
اپوزیشن کا کہنا ہے کہ یہ اس طرح استعمال ہو کہ جس سے نفرت اور منفی جذبات نہ پھیلے اور یہ مالدیپ اور اس کے بین الاقوامی پارٹنرز کے درمیان تعلقات میں رکاوٹ نہ بنیں۔
واضح رہے کہ وزیراعظم نریندر مودی نے بھارتی جزائر لکشادیپ کے دورے کی کئی تصاویر اور ویڈیوز سوشل میڈیا پر پوسٹ کی تھیں جن پر مالدیپ کے مذکورہ وزرا اور چند دیگر رہنماؤں نے تضحیک آمیز ریمارکس دیے تھے۔