بلوچستان میں سیکیورٹی فورسز کے آپریشن میں 3 دہشت گرد ہلاک ہوگئے اور میجر سید رب نواز طارق نے جام شہادت نوش کیا۔
پاک فوج کے شعبہ تعلقات عامہ (آئی ایس پی آر) کے مطابق ضلع اْوران میں فتنہ الہندوستان کے دہشت گردوں کے خلاف فورسز نے آپریشن کیا اس دوران بھارتی حمایت یافتہ 3 دہشت گرد ہلاک ہوگئے۔
ترجمان پاک فوج کا کہنا ہے کہ فائرنگ کے تبادلے میں میجر سید رب نواز طارق بہادری سے لڑتے ہوئے شہید ہوگئے۔
آئی ایس پی آر کا کہنا ہے کہ علاقے میں ممکنہ دہشت گردوں کے خاتمے کے لیے کلیئرنس آپریشن جاری ہے، فورسز بھارتی اسپانسرڈ دہشتگردی کے خاتمے کے لیے پرعزم ہیں۔
ترجمان پاک فوج کا کہنا ہے کہ بہادر جوانوں کی قربانیاں ہمارے عزم کو مزید تقویت دیتی ہیں۔
وزیراعظم شہباز شریف نے آواران آپریشن پر فورسز کو خراج تحسین پیش کیا اور فتنہ الہندوستان کے خلاف آپریشن میں فورسز کی پیشہ ورانہ صلاحیتیں لائق تحسین قرار دیں۔
شہباز شریف نے تین دہشت گروں کو ہلاک کرنے پر فورسز کی پیشہ ورانہ صلاحیتوں کی تعریف کی اور میجر سید رب نواز طارق کی شہادت پر خراج عقیدت پیش کیا۔
انہوں نے شہید کے درجات کی بلندی اور لواحقین کے لیے صبرجمیل کی دعا کی۔
وزیراعظم نے کہا کہ افسران و جوان دشمن کے ناپاک عزائم ناکام بنانے میں دن رات مصروف ہیں، دہشت گردی کے مکمل خاتمے تک جنگ جاری رکھیں گے۔