جکارتہ: انڈونیشیا کے دارالحکومت جکارتہ میں نائیجیرین سفارتکار عبدالرحمان ابراہیم پر مبینہ طور پر تین لوگوں نے حملہ کردیا جس کی ویڈیو منظرعام پر آگئی۔
غیرملکی خبررساں ادارے کی رپورٹ کے مطابق نائیجیرین سفارت کار عبدالرحمان ابراہیم پر ان کے گھر کے قریب مبینہ طور پر انڈونیشیا کے امیگریشن حکام کی جانب سے اس وقت حملہ کیا گیا جب وہ اپنی گاڑی میں جارہے تھے۔
ویڈیو میں دیکھا جاسکتا ہے کہ دو افراد سفارت کار کے ہاتھوں کو پکڑرہے ہیں جبکہ تیسرا شخص ان کے چہرے کو گاڑی کی پچھلی نشست کے ساتھ دبا رہا ہے۔
ویڈیو میں سفید ٹی شرٹ اور جینز میں ملبوس نائیجیرین سفارت کار کو مسلسل چیختے ہوئے سنا جاسکتا ہے۔
Indonesia has apologised after its immigration officers assaulted a top Nigerian diplomat, the African giant's foreign ministry said. pic.twitter.com/TOng0YIsWs
— The Realm News (@TheRealmNews) August 10, 2021
نائیجیریا کی وزارت خارجہ کا کہنا ہے کہ انڈونیشیا کی حکومت سے اس واقعے کی شکایت کی گئی ہے جبکہ انڈونیشیا کے سفیر نے حکومت کی جانب سے واقعے پر معافی مانگی ہے۔
نائیجیریا کے وزیر برائے خارجہ امور اونیاما کا کہنا ہے کہ ابراہیم پر انڈونیشین حکام نے غیرقانونی تارکین وطن کے خلاف کارروائی کے دوران حملہ کیا۔
دوسری جانب انڈونیشیا نے اس واقعے پر افسوس کا اظہار کرتے ہوئے نائیجیریا کے سفارت کار سے معذرت کی ہے۔