پاکستانی پاسپورٹ پر بیرون ملک جانے والے 6 مسافروں کو آف لوڈ کر دیا گیا، مسافر وزٹ ویزے پر آذربائیجان جا رہے تھے۔
اے آر وائی نیوز کے مطابق ایف آئی اے امیگریشن نے کراچی ائیرپورٹ پر کارروائی کرتے ہوئے پاکستانی پاسپورٹ پر بیرون ملک جانے والے 6 مسافروں کو آف لوڈ کر دیا، تمام افراد وزٹ ویزے پر آذربائیجان جا رہے تھے۔
مسافروں کے سامان سے شینگن ویزے کی فوٹوکاپیاں برآمد کر لی گئی ہیں، آف لوڈ کیے گئے مسافروں میں بادشاہ نزیر، محمد عبداللہ، عبدالظہیر، محمد کبیریا، کلیم اللہ اور عبدالرب خان شامل ہیں۔
ترجمان ایف آئی اے نے بتایا کہ دوران تلاشی ملزمان کے موبائل فونز سے یورپ کی ٹکٹیں بھی برآمد ہوئی ہیں، ابتدائی تفتیش کے مطابق ملزمان نے آذربائیجان پہنچ کر ایجنٹ سے ویزے حاصل کرنے تھے۔
ملزمان آذربائیجان سے یورپ جانا چاہتے تھے، ویزوں کی مزید جانچ پڑتال اور قانونی کارروائی کے لیے ملزمان کو اینٹی ہیومن ٹریفیکنگ سرکل کراچی منتقل کر دیا گیا، مزید تفتیش جاری ہے۔