راولپنڈی: صوبہ خیبر پختونخوا میں سکیورٹی فورسز نے دو مختلف آپریشنز کے دوران 6 دہشتگردوں کو ہلاک کر دیا۔
فوج کے شعبہ تعلقات عامہ (آئی ایس پی آر) کے مطابق ڈی آئی خان میں دہشتگردوں کی موجودگی کی اطلاع پر انٹیلیجنس بیسڈ آپریشن کے دوران فائرنگ کے تبادلے میں 5 دہشتگرد ہلاک ہوئے جبکہ شمالی وزیرستان میں دہشتگرد انعام اللہ مارا گیا۔
آئی ایس پی آر کے مطابق مارے گئے دہشتگردوں سے اسلحہ، گولہ بارود اور دھماکا خیز مواد برآمد ہوا، دہشتگرد متعدد تخریبی کارروائیوں میں ملوث تھے۔
چند روز قبل سکیورٹی فورسز نے شمالی وزیرستان میں انٹیلیجنس بیسڈ آپریشن کے دوران فائرنگ کے تبادلے میں 6 دہشتگردوں کو ہلاک کیا تھا۔ ہلاک شر پسند شہریوں کی ٹارگٹ کلنگ میں بھی ملوث تھے۔
اس سے قبل 28 اپریل کو سکیورٹی فورسز نے ڈیرہ اسماعیل خان میں انٹیلیجنس بیسڈ آپریشن کے دوران دو دہشتگردوں کو ہلاک کر کے اسلحہ اور دھماکا خیز مواد برآمد کیا تھا۔
ہلاک دہشتگردوں کی شناخت فہیم نواز عرف گنڈاپوری اور محسن نواز کے ناموں سے ہوئی تھی۔ شر پسند سکیورٹی فورسز کے خلاف دہشتگردی کی متعدد کارروائیوں سمیت ٹارگٹ کلنگ اور بھتہ خوری سمیت بے گناہ شہریوں کے قتل میں ملوث تھے۔
علاقے میں پائے جانے والے کسی دوسرے دہشتگرد کو ختم کرنے کیلیے سینی ٹائزیشن آپریشن بھی کیا گیا تھا۔