اسلام آباد (21 جولائی 2025): وزیراعظم شہباز شریف نے انکشاف کیا ہے کہ پنجاب میں مفت دوائیں دینے کے لیے بیرون ملک بھجوائے گئے 60 فیصد سیمپل جعلی تھے۔
اے آر وائی نیوز کے مطابق اسلام آباد میں طبی آلات کی لائسنسنگ، رجسٹریشن کے ڈیجیٹل نظام کی افتتاحی تقریب سے خطاب کرتے ہوئے وزیراعظم شہباز شریف نے کہا کہ فیصلہ کیا کہ بچہ امیر کا ہو یا غریب کا، اسپتالوں میں سب کو مفت دوائیں ملیں گے۔ پنجاب میں مفت دوائیں دینے کے لیے بیرون ملک سیمپل بھجوائے تو 60 فیصد جعلی نکلیں۔
وزیراعظم نے اعتراف کیا کہ پنجاب انسٹیٹیوٹ آف کارڈیالوجی میں رشوت کا بازار گرم تھا۔ وہاں دل کے مریضوں کی اموات میں اچانک اضافے کی تحقیقات کی گئیں تو پتہ چلا کہ دل کے امراض کی دوائیوں کی اسٹوریج ٹھیک نہیں تھی۔
انہوں نے مزید بتایا کہ ڈریپ نے بھی اس کو پنجاب انسٹیٹیوٹ آف کارڈیالوجی کی مجرمانہ غفلت قرار دیا۔ جب کہ لندن اور فرانس سے آنے والی رپورٹس نے تو دل دہلا دیے کہ اسپتال میں دل کے امراض کی نہیں بلکہ ملیریا کی دوائیاں تھیں۔
شہباز شریف نے وزارت صحت میں ڈیجیٹائزیشن کی تعریف کرتے ہوئے کہا کہ طبی آلات کی لائسنسنگ، رجسٹریشن کا ڈیجیٹل نظام قال ستائش ہے۔ مجھے یقین ہے کہ وہ دن جلد آئے گا، جب پاکستان کی تقدیر بدلے گی۔
انہوں نے کہا کہ ہمارے انتہائی دوست ملک نے پاکستان کو اسپتال گفٹ کیا تھا۔ یہ اسپتال اور برن یونٹ کئی سالوں سے بند پڑے ہیں۔ وزیر صحت مصطفیٰ کمال کو بتایا تو انہوں نے فوری نوٹس لیا اور اب اس کی بحالی کے لیے کام ہو رہا ہے۔
وزیراعظم نے کہا کہ جن لوگوں نے رجسٹریشن کے لیے درخواستیں دی ہیں، ان پر 20 دن میں فیصلے ہوں گے۔ اور مجھے یقین ہے کہ مصطفیٰ کمال 20 دن کے اندر اندر میرٹ پر فیصلے کر کے تاریخ رقم کریں گے۔