بھارتی فلم انڈسٹری کے سینئر اداکار نصیر الدین شاہ نے ملک میں خانہ جنگی کا خدشہ ظاہر کردیا۔
بھارتی میڈیا کی رپورٹ کے مطابق معروف اداکار نصیر الدین شاہ نے ہندو انتہا پسندوں کی جانب سے مسلم مخالف مہم جاری رکھنے کی صورت کے باعث ملک میں خانہ جنگی کا خدشہ ظاہر کر دیا۔
نصیر الدین شاہ نے کہا کہ مسلمانوں کی نسل کشی ہوئی تو ملک میں خانہ جنگی چھڑ جائے گی، ہم بھارت میں بیس کروڑ ہیں بھرپور جواب دیں گے۔
انہوں نے کہا کہ مسلمانوں کو پسماندہ اور بے کار بنانے کی کوششیں کی جا رہی ہیں اور انہیں دوسرے درجے کا شہری بنایا جا رہا ہے۔ یہ معاملے تقریباً ہر شعبے میں ہو رہا ہے۔
بھارتی اداکار نے کہا کہ مسلمانوں میں ایک فوبیا پھیلانے کی سازش کی جا رہی ہے اور یہ ہمیں خوفزدہ کرنے کی کوششیں کر رہے ہیں تاہم مجھے یہاں خوف محسوس نہیں ہوتا کیونکہ یہ میرا گھر ہے لیکن میں اپنے بچوں کے لیے فکر مند ہوں کہ ان کا کیا ہو گا۔
انہوں نے کہا کہ مسلم کشی پر بھارتی وزیر اعظم کی مکمل خاشوشی یہ ظاہر کرتی ہے کہ انہیں کوئی پرواہ نہیں ۔
اداکار نے کہا کہ بی جے پی لڑاؤ اور حکمرانی کرو کی پالیسی پر چل رہی ہے، مسلمانوں کو ڈرایا جارہا ہے ہم ڈرنے والے نہیں ہیں جواب دیں گے۔
انہوں نے کہا کہ مسجدیں اور گرجا گھر جلادیے جاتے ہیں تو کچھ نہیں ہوتا، مندر کو نقصان پہنچایا جائے تو فوری ایکشن ہوجاتا ہے۔