صدر عارف علوی اپنی اوقات اور آئینی دائرے میں رہیں، رانا ثنا

اسلام آباد: وزیر داخلہ رانا ثنا اللہ کا کہنا ہے کہ صدر عارف علوی اپنی اوقات اور آئنی دائرے میں رہیں۔

اے آر وائی نیوز کے مطابق وفاقی وزیر برائے داخلہ رانا ثنا اللہ کا کہنا ہے کہ صدر عارف علوی عمران خان سے دہشت گردی کرنے کا جواب لیں ان کے حکم پر پپٹ نہ بنیں۔

رانا ثنا اللہ نے کہا کہ آئین اور قانون شکن آئینی عہدے پر مسلط ہے مخالفین پر 15 کلو ہیروئن ڈال دی تھی اس وقت انسانی حقوق کہاں تھے، کیا اپوزیشن لیڈر کو سزائے موت کی چکی میں انسانی حقوق کے مطابق ڈالا تھا۔

انہوں نے کہا کہ مخالفین کی بہنوں، بیٹیوں کو سزائے موت کی چکیوں میں ڈالا گیا تھا، صحافیوں کی ہڈیاں پسلیاں توڑیں اس وقت انسانی حقوق کہاں تھے پولیس پر تشدد، پیٹرول بم گولیاں، غلیلیں انسانی حقوق کے مطابق چلائیں؟

وزیر داخلہ نے کہا کہ صدر عمران خان کو خط لکھیں کہ 190 ملین پاؤنڈ پاکستان کو واپس کرے وہ خط لکھیں کہ توشہ خانہ اور فارن فنڈنگ کا جواب دیں۔

واضح رہے کہ اس سے قبل صدر مملکت ڈاکٹر عارف علوی نے وزیر اعظم شہباز شریف کو الیکشن کے حوالے سے خط لکھ دیا تھا جس میں انہوں نے کہا تھا کہ آپ متعلقہ حکام کو الیکشن کمیشن کی معاونت کی ہدایت کریں۔