اسلام آباد: 9 مئی کے واقعات سے متعلق مذمتی قرارداد قومی اسمبلی میں منظور کرلی گئی۔
اے آر وائی نیوز کے مطابق 9 مئی سے متعلق مذمتی قرارداد وزیر دفاع خواجہ آصف نے پیش کی جس میں کہا گیا کہ ایک جماعت اور اس کے قائد نے 9 مئی کو تمام حدود پار کردیں۔
قرارداد کے متن کے مطابق آئین اور قانون کی دھجیاں بکھیرتے ہوئے فوجی تنصیبات پر حملے کیے گئے، حملوں سے ریاستی اداروں اور ملک کو ناقابل تلافی نقصان پہنچا۔
قرارداد میں کہا گیا کہ آئین اور قانون کے تحت کارروائی مکمل کی جائے، ملزمان کے خلاف کارروائی میں ایک دن کی تاخیر بھی نہ کی جائے، ان کی جماعت کے کارکن اور رہنما بھی کارروائیوں سے لاتعلقی اختیار کررہے ہیں۔
قرارداد کے متن کے مطابق شرپسندوں کیخلاف کارروائی میں انسانی حقوق کی خلاف ورزی نہیں کی گئی، دنیا میں فوجی تنصیبات پر حملہ کرنے پر کارروائی کا اختیار افواج کو حاصل ہے، پاکستان آرمی ایکٹ 1952 کے تحت کارروائی کرتے ہوئے سزائیں دی جائیں۔
دوسری جانب وزیر دفاع خواجہ آصف نے قومی اسمبلی میں اظہار خیال کرتے ہوئے کہا کہ ایک منصوبے کے تحت 9 مئی کو فوجی تنصیبات کو نشانہ بنایا گیا، دفاعی فورسز کا حق ہے کہ فوجی تنصیبات پر حملہ کرنے والوں کو سزائیں دیں۔
انہوں نے کہا کہ 9 مئی کے واقعات کے تمام شواہد موجود ہیں، فوجی تنصیبات اور شہدا کی یادگاروں کے علاوہ کسی چیز کو نشانہ نہیں بنایا گیا، حملے منصوبہ بندی کے تحت کیے گئے۔
خواجہ آصف نے کہا کہ ثابت ہوچکا ہے کہ ایک شخص کا ایجنڈا ملک دشمنی ہے، شہدا کی یادگاروں کی توہین کوئی پاکستانی برداشت نہیں کرسکتا۔