اسلام آباد: ایف آئی اے انسداد دہشت گردی ونگ نے سائفر کیس میں چیئرمین پی ٹی آئی کو طلب کرلیا۔
اے آر وائی نیوز کے مطابق ایف آئی اے انسداد دہشت گردی ونگ نے چیئرمین پی ٹی آٗئی کو سائفر کیس میں 25 جولائی کو طلب کیا ہے۔
چیئرمین پی ٹی آئی کو اسلام آباد ایف آئی اے ہیڈ کوارٹرز بلایا گیا ہے اور ان سے جوائنٹ انکوائری ٹیم تفتیش کرے گی۔
ایف آئی اے کی جانب سے نوٹس میں سائفر سے متعلق تمام دستاویزات بھی مانگی گئی ہیں اور کہا گیا ہے کہ عدم پیشی پر یکطرفہ کارروائی کا حق رکھتے ہیں۔
واضح رہے کہ وفاقی کابینہ کی ہدایت پر سائفر کی تحقیقات متعلق جوائنٹ انکوائری ٹیم تشکیل دی گئی تھی اور چیئرمین پی ٹی آئی کو پہلے بھی طلب کیا گیا تھا مگر وہ پیش نہیں ہوئے تھے۔
یاد رہے کہ لاہور ہائی کورٹ نے سابق وزیراعظم کے خلاف سائفر معاملے پر ایف آئی اے کی تحقیقات پر جاری حکم امتناع واپس لیا تھا۔
سائفر کی تحقیقات کے لیے وفاقی حکومت کی حکم امتناع ختم کرانےکی متفرق درخواست منظور کرلی گئی تھی اور ایف آئی اے کو سائفر کے معاملے پر تحقیقات کی اجازت مل گئی تھی۔
جسٹس علی باقر نجفی نے وفاقی حکومت کی درخواست پر فیصلہ سناتے ہوئے سائفر تحقیقات پر جاری حکم امتناع واپس لیا تھا۔