کراچی: پی آئی اے کے اکاؤنٹ منجمد ہوئے 48 گھنٹے سے زائد ہوگئے اب ایئرلائن نے اکاؤنٹ کھلوانے کے لیے ایف بی آر کو تحریری پیمنٹ پلان دے دیا ہے۔
اے آر وائی نیوز کے مطابق ترجمان پی آئی اے کا کہنا ہے کہ پی آئی اے اور ایف بی آر کے درمیان معاملات طے پاگئے ہیں، کاغذی کارروائی کے بعد اکاؤنٹس جلد ہی بحال کردیے جائیں گے۔
پی آئی اے نے فیڈرل ایکسائز ڈیوٹی کی مد میں دو ارب سے زائد رقم ادا کرنی ہے۔
ایف بی آر ذرائع کے مطابق واجبات کی عدم ادائیگی پر پی آئی اےکے 53اکاؤنٹس گزشتہ سال بھی منجمد کیے گئے تھے۔
انتظامیہ کی جانب سے واجبات کی جلد ادائیگی کی یقین دہانی پر ان اکاؤنٹس کو بحال کیا گیا تھا لیکن اب پی ایس او نے قومی ایئرلائن کی 3پروازوں کو فیول کی فراہمی سے بھی انکارکر دیا ہے۔
فیول کی عدم فراہمی کے باعث اسلام آباد سے کراچی کی پرواز پی کے309، کراچی تا ملتان کی پی کے330متاثر ہوئیں۔
اس کے علاوہ طیارے میں فیول نہ ہونے کی وجہ سے ملتان سے جدہ کی پرواز پی کے739بھی متاثرہ پروازوں میں شامل ہے۔
ترجمان پی آئی اے نے اکاؤنٹس بندش کی تصدیق کرتے ہوئے کہا تھا کہ اکاؤنٹس بحالی کے لئے ایف بی آر سے حکومتی سطح پر رابطے جاری ہیں، اکاؤنٹس بندش کے باوجود راحال فضائی آپریشن جاری ہے۔