کراچی میں صبح سے ہونے والی بارش کے دوران مختلف حادثات میں جاں بحق افراد کی تعداد 8 ہو گئی۔
منگل کی صبح سے وقفے وقفے سے جاری موسلادھار بارش سے شہر کا نظام درہم برہم ہو گیا جب کہ معمولات زندگی مفلوج ہو گئے۔
بارش کے دوران مختلف حادثات میں اب تک 8 افراد کے جاں بحق ہونے کی اطلاعات موصول ہوئی ہیں جب کہ متعدد زخمی ہوئے ہیں۔
گلستان جوہر بلاک 12 میں 4 افراد دیوار گرنے سے جاں بحق ہوئے۔ نارتھ کراچی اورڈیفنس میں کرنٹ لگنے سے 2 افراد جاں بحق ہوئے۔
https://urdu.arynews.tv/schools-closed-for-one-week-amid-heavy-rains-flash-floods/
اورنگی ٹاؤن میں بھی کرنٹ لگنے سے نوجوان جان کی بازی ہار گیا جب کہ ملیر میں پیٹرول پمپ میں آگ لگنے سے ایک شخص جاں بحق ہوا ہے۔
کراچی میں بارش کے باعث اربن فلڈنگ کی صورت حال کے باعث سندھ حکومت کا کہنا ہے کہ کل نجی و سرکاری اسکول بند رہیں گے۔
واضح رہے کہ اس سے قبل خیبرپختونخوا حکومت نے منگل کے روز صوبے کے سرد پہاڑی علاقوں میں تمام اسکول ایک ہفتے کیلئے بند کرنے کا اعلان کیا تھا، یہ فیصلہ حالیہ کلاوڈ برسٹ، طوفانی بارشوں اور فلیش فلڈز کے پیش نظر کیا گیا ہے۔