اسلام آباد: نو مئی واقعات سے متعلق زیر حراست شر پسندوں کے موبائل فونز سے فرانزک کے دوران مزید تصاویر برآمد ہوئی ہیں۔
تفصیلات کے مطابق سانحہ 9 مئی سے متعلق مزید ہوش رُبا تصاویر منظر عام پر آ گئیں، شرپسندوں نے عسکری اسپتال، ایئر فورس بیس سرگودھا، عسکری تعلیمی اداروں کو بھی نہ بخشا۔
بیش تر تصاویر زیر حراست شر پسندوں کے موبائل فونز سے فرانزک کے دوران برآمد ہوئیں، پاک امارات اسپتال کی عمارت کو نقصان پہنچایا گیا، ملحقہ اسٹینڈ بائی جنریٹر روم کو بھی آگ لگائی گئی۔ بجلی معطلی سے ایمرجنسی میں مریضوں کی حالت تشویش ناک ہو گئی تھی، وینٹی لیٹرز اور انکیوبیٹرز بند ہو گئے تھے۔
سی ایس ڈی لاہور سے احتجاج کے بہانے لاکھوں روپے کیش بھی لوٹ لیا گیا، عسکری تاریخ، جنگوں میں فوجی یونٹوں کا ریکارڈ رکھنے والے ادارے پر دھاوا بول کر ریکارڈ جلایا گیا۔
چکدرہ قلعے پر حملے کے بعد پورے قلعے، ریکارڈ اور گاڑیوں کو بھی نذر آتش کیا گیا، لیفٹیننٹ سجاد عالم شہید کی یادگار پر تصویر کو جلا کر چیئرمین پی ٹی آئی زندہ باد لکھ دیا گیا۔