لاہور: 9 مئی کے روز چیئرمین پاکستان تحریک انصاف کی گرفتاری کے بعد جلاؤ گھیراؤ کے واقعات کی جاری تحقیقات میں اہم پیشرفت ہوئی ہے۔
اے آر وائی نیوز کے مطابق 9 مئی کے روز سیف سٹی کیمروں کی فرانزک رپورٹ آگئی جسے پنجاب فرانزک سائنس ایجنسی کی جانب سے تیار کی گئی ہے۔
رپورٹ میں بتایا گیا کہ پُرتشدد ہجوم کالبرٹی سے گرجا چوک تک جانے کا ثبوت مل گیا جبکہ ویڈیوز میں پی ٹی آئی رہنما ملزم اعجاز چوہدری کی موجودگی بھی پائی گئی ہے۔
فرانزک رپورٹ میں بتایا گیا کہ پنجاب فرانزک سائنس ایجنسی کو مختلف ویڈیوز بھجوائی گئی تھیں، گرفتار تمام ملزمان ویڈیوز میں کارروائیاں کرتے نظر آئے ہیں۔
رپورٹ کے مطابق 4 بج کر 57 منٹ پر ہجوم میں شامل افراد شیر پاؤ برج پر پیدل آئے جبکہ 5 بج کر 10 منٹ پر موٹر سائیکل سواروں کا ہجوم بھی گرجا چوک پر اکٹھا ہوا، 5 بج کر 16 منٹ پر طفیل روڈ اور اسد جان روڈ پر بھی ہجوم کے شواہد ملے۔
فرانزک رپورٹ کے مطابق 5 بج کر 25 منٹ پر ہجوم مال آف لاہور کے باہر پہنچا، 5 بج کر 35 منٹ سے 6 بج کر 45 منٹ تک ہجوم کے بھی شواہد مل گئے، ہجوم کے افشاں چوک، فورٹریس اسٹیڈیم چوک، میڈیکل چوک تک کے شواہد ملے۔
رپورٹ میں بتایا گیا کہ 8 بج کر 40 منٹ پر سی ایس ڈی میں ہجوم کے داخل ہونے کی ویڈیو بھی ہے، تجزیاتی رپورٹ عدالت میں پیش کی جائے گی تاکہ ملزمان کو سزائیں مل سکیں۔