لاہور: تحریک انصاف کے سینئر وزیر علیم خان نے سڑک کنارے بے یارو مددگار زندگی گزارنے والی شاعرہ اور صحافی روبینہ پروین کی مکمل کفالت کا اعلان کردیا۔
تفصیلات کے مطابق اے آر وائی نیوز نے 10 ستمبر کو ماضی کی صحافی اور شاعرہ روبینہ پروین کی لاہور میں سڑک پر بے یارو مددگار زندگی گزارنے اور اُن کے ساتھ پیش آنے والے واقعات کی رپورٹ پیش کی تھی۔
حالات کی ستم ظریفی نے 53 سالہ شاعرہ کا ذہنی توازن بھی خراب کردیا اور وہ اب فٹ پاتھ پر بیٹھی بیٹی کی یاد میں اداس رہتی ہیں۔ روبینہ پروین20سال قبل ادبی محفلوں میں حصہ لیتی تھیں مگر صرف تین سال میں انہیں سب نے تنہا چھوڑ دیا۔
اے آر وائی نیوز کی نمائندہ رابعہ نور سے گفتگو کرتے ہوئے انہوں نے اپنے اشعار سنائے، ان کا کہنا تھا کہ مجھے میری بیٹی نماز کی طرح پانچ وقت یاد آتی ہے۔
علیم خان کا اعلان
تحریک انصاف کے سینئر وزیر علیم خان نے اے آر وائی نیوز کی خبر کا نوٹس لیتے ہوئے اُن کے مکمل علاج اور کفالت کی ذمہ داری اٹھانے کا اعلان کیا۔
Having seen this ARY report, moved by the story, I’ll be taking responsibility of Ms Rubina Perveen’s medical treatment. In addition, she will receive a monthly allowance.
Journalists like other members of society must not ever feel they are alone in their time of need. pic.twitter.com/gYdNozJDgF
— Abdul Aleem Khan (@aleemkhan_pti) September 15, 2018
سماجی رابطے کی ویب سائٹ پر ایک ٹویٹ میں اُن کا کہنا تھا کہ اےآروائی نیوزکی رپورٹ دیکھ کردل بھرآیا، روبینہ پروین کاعلاج کراؤں گا اور انہیں ماہانہ وظیفہ بھی دیاجائےگا۔
علیم خان کا کہنا تھا کہ صحافی یا معاشرے کے کسی بھی فردکو برےحالات میں کبھی تنہا نہیں چھوڑناچاہیے۔