اسلام آباد: وزیرمملکت برائے ریونیو حماد اظہر نے کہا ہے کہ حکومت نے دیر سے ٹیکس ریٹرن جمع کرانے والوں پر عائد جرمانہ ختم کردیا۔
سماجی رابطے کی ویب سائٹ ٹویٹر پر حماد اظہر نے ٹیکس فائلرز کو بڑی خوش خبری سناتے ہوئے کہا کہ ’حکومت نے مقررہ تاریخ کے بعد ریٹرن جمع کرانے والوں پر عائد ہونے والے جرمانے کو ختم کردیا‘۔
The government has decided to waive the penalty for late filing along with audit for Salaried Group of late filer cases. These cases were selected for audit and penalty was prescribed by the previous government. This govt is committed on facilitating people in filing returns.
— Hammad Azhar (@Hammad_Azhar) November 27, 2018
اُن کا کہنا تھا کہ حکومت ٹیکس فائلرز کو سہولتیں دینے کے لیے پرعزم ہے، ٹیکس فائلرز کے آڈٹ اور مقررہ تاریخ کے بعد ریٹرن فائل کرنے پر جرمانے کا فیصلہ گزشتہ حکومت کا تھا جسے ختم کردیا گیا۔
یاد رہے کہ فیڈرل بورڈ آف ریونیو (ایف بی آر) نے ٹیکس ریٹرن جمع کرانے کی آخری تاریخ 30 نومبر مقرر کی ہوئی ہے اور تمام فائلرز کو ہدایت کی کہ وہ مقررہ تاریخ تک اپنے گوشوارے جمع کرادیں۔
مزید پڑھیں: ایف بی آر میں اصلاحات کے فیصلے کی بھرپور حمایت کرتے ہیں: پاکستان اکانومی واچ
قبل ازیں مقررہ تاریخ گزر جانے کے بعد ریٹرن فائل کرنے والے شخص کو اضافی رقم بطور جرمانہ ادا کرنا پڑتی تھی اس کے علاوہ آڈٹ کے مرحلے سے بھی گزرنا پڑتا تھا۔
واضح رہے کہ عمران خان نے اپنی انتخابی مہم کے دوران متعدد بار اعلان کیا تھا کہ تحریک انصاف کی حکومت تاجروں کو ریلیف دے گی تاکہ ملکی معیشت کو بہتری کی طرف لایا جائے اور بیرونی قرضوں سے نجات حاصل کی جاسکے۔