اسلام آباد : وزیراعظم عمران خان نے وفاقی کابینہ کا اجلاس کل طلب کرلیا، اجلاس میں ایک بار پھر ای سی ایل میں ناموں پر نظرثانی سمیت 17 نکاتی ایجنڈے پر غور کیا جائے گا۔
تفصیلات کے مطابق وزیراعظم عمران خان نے وفاقی کابینہ کا اجلاس کل طلب کرلیا، اجلاس کل صبح ساڑھے 11 بجے وزیراعظم آفس میں ہوگا، جس کا 17 نکاتی ایجنڈا جاری کردیا گیا ہے۔
وفاقی کابینہ ایک بار پھر ای سی ایل میں ناموں پر نظرثانی کرے گی اور پاکستان ٹیلی کمیونیکیشن اتھارٹی کے چیئرمین کے تقرر کی منظوری دی جائےگی جبکہ کیس لڑنے کےلیےقانونی ماہر کے اخراجات کی کابینہ سےمنظوری حاصل کی جائےگی۔
کابینہ اجلاس میں سیمنٹ انڈسٹری میں سپلائی ،ڈیمانڈ اور قیمتوں کا جائزہ لیا جائے گا جبکہ منسٹری آف نیشنل فوڈ کے ناقابل استعمال طیارےکوٹھکانےلگانے اور پاور ڈویژن کے لیےضمنی گرانٹ کی بھی منظوری دی جائےگی۔
دوران ملازمت جاں بحق سرکاری ملازمین کی فیملیزکی مالی امداد پرپیکج کی منظوری بھی ایجنڈے کا حصہ ہے جبکہ صدرمملکت کی تنخواہ میں اضافےکےباعث ضمنی گرانٹ کے اجرا کی کابینہ منظوری دے گی۔
مزید پڑھیں : بلاول بھٹواوروزیراعلیٰ سندھ کا نام سپریم کورٹ کےتحریری فیصلےتک ای سی ایل سے نہ نکالنےکا فیصلہ
یاد رہے گذشتہ وفاقی کابینہ اجلاس میں بلاول بھٹو زرداری اور وزیراعلیٰ سندھ مراد علی شاہ کا نام فوری ای سی ایل سے نہ نکالنے کا فیصلہ کیا تھا اور کہا گیا تھا کہ کابینہ نام ای سی ایل سے نکالنے کے لیے عدالتی تفصیلی فیصلے کا انتظار کرے گی، تحریری فیصلہ ملنے کے بعد نام ای سی ایل سے نکالنے کا حتمی فیصلہ ہوگا۔
کابینہ اجلاس میں چیف کمشنراسلام آبادعامر احمد علی کو چیئرمین سی ڈی اے کا اضافی چارج اور ایئر مارشل ارشد ملک کو پی آئی اے کے ایڈیشنل ایم ڈی کاعارضی چارج دے دیا گیا تھا۔
بعد ازاں فوادچوہدری کا میڈیا بریفنگ میں کہنا تھا کہ جےآئی ٹی کی درخواست پرکابینہ نے172افرادکے نام ای سی ایل میں ڈالے تھے اور وزارت داخلہ نے درخواست کی20افراد کےنام فوری ای سی ایل سے ہٹا دیئے جائیں، کابینہ نےوزارت داخلہ کی درخواست فوری قبول کرنے سے معذرت کی ہے۔