لاہور : گورنر پنجاب چوہدری سرور نے کہا ہے کہ کسی سیاسی مخالف کے خلاف انتقامی کارروائی نہیں کی جائے گی، عوام کو بنیادی سہولتوں کی فراہمی حکومت کی اولین تر جیح ہے۔
ان خیالات کا اظہار انہوں نے لاہور میں میڈیا سے گفتگو کرتے ہوئے کیا۔ چوہدری سرور نے کہا کہ حکومت نے کرپشن کے خلاف جہاد شروع کر رکھا ہے۔
ملک میں احتساب کا عمل پٹواری اور سپاہی سے نہیں بلکہ اوپر سے شروع ہوگا، وزیر اعظم سمیت ہم سب خود کو احتساب کیلئے پیش کرتے ہیں، کسی کے خلاف انتقامی کارروائی کا سوال ہی پیدا نہیں ہوتا، اپوزیشن بتائے ان کے خلاف کون سا کیس حکومت نے بنایا؟
ایک سوال کے جواب میں گورنر پنجاب کا کہنا تھا کہ عوام کو بنیادی سہولتوں کی فراہمی حکومت کی اولین تر جیح ہے، حکومت انصاف کی بالادستی اور قانون کی حکمرانی کیلئے کام کررہی ہے، کسی سیاسی مخالف کے خلاف انتقامی کارروائی نہیں کی جائے گی، حکومت عوام کو بنیادی سہولیات فراہم کرنے کیلئے اقدامات کر رہی ہے۔