لاہور : اپوزیشن لیڈر شہباز شریف نے نام ای سی ایل سے نکالنے کے لئے ہائی کورٹ میں درخواست دائر کرنے کے معاملے پر کلاء سے مشاورت مکمل کرلی ہے ، درخواست رواں ہفتے دائر کی جائے گی۔
تفصیلات کے مطابق اپوزیشن لیڈر شہباز شریف نے اپنا نام ای سی ایل سے نکالنے کے لئے ہائی کورٹ میں درخواست دائر کرنے پر وکلاء سے مشاورت مکمل کر لی ہے اور متعلقہ دستاویزات بھی اپنے وکلاء کو فراہم کر دی ہیں۔
امکان ہے کہ شہباز شریف کی جانب سے درخواست رواں ہفتے دائر کی جائے گی۔
شہباز شریف کے وکیل اعظم نذیر تارڑ کا کہنا ہے کہ ہائیکورٹ بار کے انتخابات میں مصروفیت کے باعث پٹیشن دائر نہیں کی جا سکی، ای سی ایل میں نام ڈالنا بنیادی حقوق کی سنگین خلاف ورزی ہے۔
مزید پڑھیں :شہباز شریف کا نام ای سی ایل میں ڈال دیا گیا
یاد رہے وزارت داخلہ نے بیب کی سفارش پر اثاثہ جات کیس میں سابق وزیراعلیٰ پنجاب اور اپوزیشن قومی اسمبلی شہباز شریف کا نام ایگزٹ کنٹرول لسٹ (ای سی ایل) میں ڈال دیا تھا۔
اس سے قبل19 فروری کو اپوزیشن لیڈر قومی اسمبلی شہبازشریف پر بیرون ملک جانے پر پابندی عائد کردی گئی تھی اور وزیر داخلہ کی ہدایت پر ان کا نام عبوری قومی شناختی فہرست میں شامل کرلیاگیا تھا اور کہا تھا کہ شہباز شریف کا نام ای سی ایل پر ڈالنے تک عبوری قومی شناختی فہرست میں رہےگا، فہرست میں شامل افراد کے 30 دن کیلئے بیرون ملک جانے پر پابندی ہوتی ہے۔
خیال رہے اثاثہ جات کیس میں شہباز شریف کے بیٹوں حمزہ شہباز اور سلمان شہباز کے خلاف بھی تحقیقات جاری ہیں جبکہ نیب نے شہباز شریف اور حمزہ شہباز کے خلاف رمضان شوگر ملز ریفرنس دائر کر دیا ہے۔
واضح رہے کہ قومی احتساب بیورو (نیب) نے آشیانہ اقبال ہاؤسنگ اسکینڈل میں شہباز شریف کو 5 اکتوبر 2018 کو گرفتار کیا، جس کے بعد 14 فروری کو لاہور ہائی کورٹ شہباز شریف کی درخواست ضمانت منظور کرتے ہوئے رہا کرنے کا حکم جاری کیا تھا۔