کنگسٹن: ورلڈکپ جیسے جیسے قریب آرہا ہے، ایونٹ میں حصہ لینے والے ممالک اپنی تیاریاں مکمل کررہے ہیں، ویسٹ انڈیز کرکٹ بورڈ نے ایک بار پھر بڑے ایونٹ کے لیے مایہ ناز بلے باز کو اہم ذمہ داری سونپ دی۔
تفصیلات کے مطابق ویسٹ انڈیز کرکٹ بورڈ نے کرس گیل کو آئی سی سی ورلڈکپ 2019 کے لیے اپنی ٹیم کا نائب کپتان مقرر کردیا جبکہ ٹیم کی قیادت جیسن ہولڈر کریں گے۔
یاد رہے کہ اوپننگ کرنے والے بلے باز ویسٹ انڈیز کی ٹیم کے سابق کپتان رہ چکے ہیں، وہ اپنے کیریئر کا پانچواں ورلڈکپ کھیلنے جارہے ہیں، اگر کارکردگی پر بات کی جائے تو 39 سالہ گیل 289 ون ڈے میچز میں 10 ہزار سے زائد رن بنا چکے ہیں۔
مزید پڑھیں: آئی سی سی کرکٹ ورلڈکپ، مسلمان کھلاڑیوں کے لیے خصوصی سیکیورٹی پلان تیار
کرکٹ بورڈ کی جانب سے ذمہ داریاں ملنے کے بعد کرس گیل کا کہنا تھا کہ وہ حکام کے شکر گزار ہیں کہ ایک بار پھر بھروسہ کیا۔ اُن کا کہنا تھا کہ ’’سینئر کھلاڑی کی حیثیت سے عہدہ ملنے کے بعد مجھ پر ذمہ داریاں بڑھ گئیں، ہم ٹیم کو متحد کر کے چلیں گے تاکہ کامیابیاں حاصل کرسکیں‘‘۔
انہوں نے اس عزم کا اظہار کیا کہ ورلڈکپ 2019 میں ویسٹ انڈیز کی ٹیم بہترین کارکردگی دکھائے گی، عوام اور پرستاروں کو جو توقعات ہیں ہم اُن کو پورا کرنے کی ہر ممکن کوشش کریں گے۔ یہ بھی یاد رہے کہ ویسٹ انڈیز کی ٹیم اب تک دو بار ون ڈے کرکٹ ورلڈکپ کا ٹائٹل اپنے نام کرچکی ہے۔