لاہور: داتا دربار کے باہر ہونے والے خودکش دھماکے میں زخمی ہونے والا ایک اور پولیس اہلکار دم توڑ گیا جس کے بعد شہدا کی تعداد 11 ہوگئی۔
تفصیلات کے مطابق گزشتہ روز داتا دربار کے باہر ہونے والے خودکش دھماکے میں زخمی ہونے والا پولیس اہلکار صدام حسین دم توڑ گیا۔
صدام کی موت زیادہ خون بہنے کی وجہ سے ہوئی، شہید ایلیٹ فورس کے اہلکار کا تعلق قصور سے تھا۔
دوسری جانب لاہور دھماکے میں شہید ہونے والے دو پولیس اہلکاروں کی نماز جنازہ ان کے آبائی علاقوں میں ادا کرنے کے بعد سپرد خاک کردیا گیا۔
ایلیٹ فورس کے ہیڈ کانسٹیبل گلزار کی نماز جنازہ چک جان محمد والا سرگودھا اور جوان سہیل صابر ورک کی نماز جنازہ گوجرانوالہ میں ادا کی گئی۔
داتا دربار کے باہردھماکہ، 10 افراد شہید، 25 زخمی
یاد رہے کہ گزشتہ روز داتا دربار کے قریب ایلیٹ فورس کی گاڑی کے قریب دھماکے کے نتیجے میں 5 پولیس اہلکاروں سمیت 10 افراد شہید اور25 زخمی ہوئے تھے۔
وزیراعظم عمران خان سمیت سیاسی ومذہبی شخصیات نے داتا دربار کے باہرخودکش حملے کی شدید مذمت کرتے ہوئے مشکل کی اس گھڑی میں اتحاد کا پیغام دیا۔