تیراپاکستان ہےنہ میراپاکستان ہے، یہ آئی ایم ایف کا پاکستان ہے، فاروق ستار

کراچی : ایم کیو ایم پاکستان کے رہنما فاروق ستار نے کہا تیراپاکستان ہےنہ میراپاکستان ہے،یہ آئی ایم ایف کا پاکستان ہے، لوگ مہنگائی،غربت، بے روزگاری کےبوجھ تلے دبے جارہے ہیں، تباہی و بربادی کا عمل نہ روکاتورمضان کے بعد عوام کو سڑکوں پرہوں گے۔

تفصیلات کے مطابق ایم کیو ایم پاکستان کے رہنما فاروق ستار نے عدالت میں پیشی کے بعد میڈیا سے گفتگو کرتے ہوئے کہا 22 اگست کیس میں اگلی تاریخ 25 مئی ملی ہے، شناخت پریڈ کا عمل آج کی سماعت میں ہوا ہے، اس مقدمے میں بھی باعزت بری ہوں گے۔

فاروق ستار کا کہنا تھا لوگ مہنگائی، غربت، بے روزگاری کےبوجھ تلےدبےجارہےہیں، معاشی بدحالی نہ رکی توعوام خودمعاملات ہاتھ میں لے لیں گے، تیرا پاکستان  ہے نہ میراپاکستان ہے، یہ آئی ایم ایف کا پاکستان ہے۔

رہنما ایم کیو ایم پاکستان نے کہا پانی کےاوپرفسادات ہوتے نظر آرہے ہیں، اب ملک مزید تجربوں کا متحمل نہیں ہوسکتا، تباہی و بربادی کا عمل نہ روکا تو رمضان کے بعد عوام کو سڑکوں پرہوں گے۔

تباہی و بربادی کا عمل نہ روکا تو رمضان کے بعد عوام کو سڑکوں پرہوں گے،فاروق ستار

ان کا کہنا تھا عوام نے تمام سیاسی جماعتوں کو مسترد کردیا ہے، تحریک انصاف کی نااہلی لوگوں میں مایوسی کا سبب بنی ہے، مسلم لیگ ن اور پیپلز پارٹی کا کڑا احتساب ہونا چاہیے۔

فاروق ستار  نے مزید کہا ایم کیو ایم پاکستان کے کرپٹ عناصر کیخلاف بھی کارروائی ہونی چاہیے، وفاق کو سندھ کے دیہی علاقوں پر توجہ مرکوز کرنی چاہئے۔

اس سے قبل کراچی کی انسداد دہشت گردی عدالت میں اے آر وائی نیوزکے دفتر پر حملے سے متعلق دو مقدمات پر سماعت ہوئی ، فاروق ستار، عامر خان، کنور نوید، شاہد پاشا و دیگر عدالت میں پیش ہوئے، تفتیشی افسر گواہ جوڈیشل مجسٹریٹ کلیم اللہ بھی پیش ہوئے۔

ملزمان کےوکلا نےگواہ پرجرح کی جو آئندہ سماعت پر بھی جاری رہے گی ، جوڈیشل مجسٹریٹ کلیم اللہ نے چھبیس ملزموں کی شناخت پریڈ کی تھی ، عدالت کیس میں بانی ایم کیو ایم سمیت نو ملزمان کواشتہاری قرار دےچکی ہے۔

کیس کی مزید سماعت پچیس مئی تک ملتوی کردی گئی۔