کولمبو: سری لنکن آل راؤنڈر تھیسارا پریرا نے پاکستان نہ آنے کے راز سے پردہ اٹھادیا۔
تفصیلات کے مطابق پاکستان کے دورے پر آنے والی سری لنکن ٹیم کے کھلاڑی نسبتاً کم تجربہ کار تھے جبکہ اس ٹیم کے مستقل کپتان تھیسارا پریرا نے بھی ٹیم کے پاکستان آنے سے معذرت کرلی تھی۔
تھیسارا پریرا کے اس نکار کو پاکستان میں سخت ناپسند کیا گیا جبکہ فواد چوہدری کا کہنا تھا کہ بھارت کی جانب سے دھمکی دی گئی تھی کہ اگر آئی پی ایل کھیلنے والے سری لنکن کھلاڑیوں نے پاکستان کا دورہ کیا تو انڈین پریمیئر لیگ سے خود کو فارغ سمجھیں۔
تھیسارا پریرا نے جمود کو توڑتے ہوئے پاکستان نہ آنے کی اصل وجہ بتاتے ہوئے سماجی رابطے کی ویب سائٹ ٹویٹر پر کہا ہے کہ جب وہ کیریبین لیگ کے لیے ویسٹ انڈیز میں موجود تھے انہیں ڈینگی ہوگیا تھا۔
When I was in Caribbean I got dengue mate
There was no way I could support anyone in anyway. Still rested on Doctors advice
People speak without knowing anything 😊 https://t.co/oNAfckfeDZ— Thisara perera (@PereraThisara) October 8, 2019
سری لنکن آل راؤنڈر کا کہنا تھا کہ لوگوں نے ان کے پاکستان نہ آنے کے بارے میں کچھ جانے بغیر ہی بہت باتیں بنائیں۔
انہوں نے کہا کہ ڈاکٹرز نے آرام کا مشورہ دیا تھا، میں کسی بھی طرح کسی کی کوئی مدد نہیں کرسکتا تھا، لوگ بغیر حقیقت جانے کچھ بھی بول دیتے ہیں۔
یاد رہے کہ سری لنکن آل راؤنڈر تھیسارا پریرا دو سال قبل جب ورلڈ الیون کی ٹیم نے پاکستان کا دورہ کیا تھا تو وہ اس ٹیم کا حصہ تھے۔
خیال رہے کہ سری لنکن نے گزشتہ روز آخری ٹی 20 میچ میں پاکستان کو شکست دے کر کلین سویپ کیا تھا جبکہ ون ڈے سیریز میں پاکستان نے 2-0 سے کامیابی حاصل کی تھی۔