لاہور: پاکستانی اداکار حمزہ علی عباسی کے ٹویٹ پر مختلف چہ مگوئیاں شروع ہوگئیں اور ساتھ ہی اُن کے مداح بھی تذبذب کا شکار ہوگئے۔
تفصیلات کے مطابق پاکستانی اداکار حمزہ علی عباسی نے ٹویٹ میں لکھا کہ ’’ایک دہائی سے زائد عرصے پر محیط سفر اپنے اختتام کو پہنچ گیا، رواں ماہ کے آخر میں بہت اہم اعلان کروں گا‘‘۔
انہوں نے لکھا کہ ’’اکتوبر کے اواخر تک سوشل میڈیا سے دور رہوں گا اور امید کرتا ہوں کہ میری بات کو زیادہ سے زیادہ لوگ سنیں گے‘‘۔
A journey of more than a decade comes to an end. I have a very important announcement to make at the end of this month. Will hope my voice reaches many. Will be off social media till end of Oct.
— Hamza Ali Abbasi (@iamhamzaabbasi) October 11, 2019
یاد رہے کہ حمزہ علی عباسی نے اداکارہ نیمل خاور کے ساتھ 25 اگست کو شادی کی جس کے بعد اُن کی اہلیہ نےانڈسٹری کو خیر باد کہہ دیا۔
حمزہ علی عباسی کے ٹویٹ پر مداحوں کا کہنا ہے کہ وہ بھی اپنی اہلیہ کی طرح انڈسٹری کو خیر باد کہنے جارہے ہیں جبکہ کچھ صارفین کا ماننا ہے کہ وہ سیاست سے کنارہ کشی اختیار کرلیں گے۔
یاد رہے کہ حمزہ علی عباسی نے اپنے کریئر کا آغاز 2006 میں تھیٹر سے کیا، بعد ازاں انہوں نے اے آر وائی ڈیجیٹل کے ڈرامے پیارے افضل میں مرکزی کردار ادا کر کے شہرت کی بلندیوں کو چھوا، اسی دوران انہوں نے مختلف فلمیں بھی کیں۔