سڈنی: کینگروز نے ٹی 20 کے عالمی کپ کی تیاری کا دھماکا خیز آغاز کرتے ہوئے سری لنکا کو پہلے ٹی ٹوینٹی میچ میں 134 رنز سے شکست دے دی۔
تفصیلات کے مطابق ہوم گراؤنڈ پر آسٹریلیا نے سری لنکا کو پہلے ٹی ٹوینٹی میچ میں 134 رنز سے شکست دے کر پاکستان کو خبردار کردیا، ڈیوڈ وارنر نے ٹی ٹوینٹی میں شاندار واپسی کرتے ہوئے کیریئر کی پہلی سنچری جڑ دی۔
آسٹریلوی اوپنر ڈیوڈ وارنر کو 56 گیندوں پر شاندار ناقابل شکست سنچری اسکور کرنے پرمیچ کا بہترین کھلاڑی قرار دیا گیا۔
آسٹریلوی کپتان ایرون فنچ نے 64 رنز بنائے، پاور ہٹر گلین میکسویل 28 گیندوں پر 62 رنز بنا کر شناکا کا نشانہ بنے۔
A great start to the Gillette T20 INTL Series for our Aussies as David Warner posted 100no in a 134-run win at the Adelaide Oval #AUSvSL pic.twitter.com/42kcGszjsV
— Cricket Australia (@CricketAus) October 27, 2019
آسٹریلیا نے مقررہ اوور میں 233 رنز بنائے اور سری لنکا کو جیت کے لیے 234 رنز کا بڑا ہدف دیا، سری لنکن ٹیم ہدف کے تعاقب میں 20 اوورز میں 9 وکٹوں کے نقصان پر 99 رنز بناسکی، مہمان ٹیم کے 6 بیٹسمین ڈبل فگرز میں بھی داخل نہ ہوسکے۔
سری لنکن آل راؤنڈر شناکا 17 اور پریرا 16 رنز بنا کر نمایاں رہے، ایڈم زمپا نے تین کھلاڑیوں کو پویلین کی راہ دکھائی۔
فاسٹ بولر مچل اسٹارک نے دو اور پیٹ کمنز نے بھی دو وکٹیں حاصل کیں۔
یاد رہے کہ پاکستانی کرکٹ ٹیم آسٹریلیا پہنچ گئی ہے، قومی ٹیم آسٹریلیا میں 3 ٹی ٹوینٹی اور 2 ٹیسٹ میچز کی سیریز کھیلے گی۔
قومی ٹیم کے کپتان بابر اعظم کا آسٹریلیا روانگی سے قبل کہنا تھا کہ آسٹریلیا میں مثبت کرکٹ کھیلیں گے، ہم کینگروز کی طرح ٹی ٹوینٹی سیریز میں جارحانہ حکمت عملی اپنائیں گے۔