اسلام آباد: پاکستان کے متعدد وزرائے اعظم کو اقوام متحدہ کی جنرل اسمبلی کے اجلاس میں شرکت کا موقع ملا ہے، کس وزیر اعظم نے دورے پر کتنے خرچ کیے، فیصل جاوید نے تفصیل بتا دی ہے۔
تفصیلات کے مطابق پی ٹی آئی کے سینیٹر فیصل جاوید نے ٹویٹ کرتے ہوئے لکھا ہے کہ وزیر اعظم عمران خان اوروں کی طرح عوام کے پیسے پر عیاشیاں نہیں کرتے، ان کے اقوام متحدہ کے دورے پر سب سے کم پیسے خرچ ہوئے۔
فیصل جاوید کے مطابق آصف زرداری نے اقوام متحدہ کے دورے پر 13 لاکھ ڈالرز خرچ کیے، نواز شریف نے 11 لاکھ ڈالرز خرچ کیے، جب کہ شاہد خاقان عباسی نے اقوام متحدہ کے دورے پر 7 لاکھ ڈالرز خرچ کیے۔
فیصل جاوید کا کہنا ہے کہ ایک طرف اقوام متحدہ کے دوروں پر اتنے اخراجات کیے گئے دوسری طرف وزیر اعظم عمران خان نے صرف 1.5 لاکھ ڈالرز خرچ کیے ہیں۔
یو این جنرل اسمبلی نیویارک کے دوروں میں مختلف سربراہوں کے خرچوں کا جائزہ :
آصف زرداری 13 لاکھ ڈالرز
نواز شریف 11 لاکھ ڈالرز
شاہد خاقان عباسی 7 لاکھ ڈالرز
عمران خان صرف 1.5 لاکھ ڈالرز— Faisal Javed Khan (@FaisalJavedKhan) October 27, 2019
انھوں نے مزید لکھا کہ اپوزیشن کہتی ہے کہ عمران خان گھر جائیں، وہ تو روز گھر جاتے ہیں، اور اپنے گھر جاتے ہیں، دوسروں کی طرح پی ایم ہاؤس میں نہیں رہتے، وزیر اعظم اپنے گھر کا خرچہ بھی خود ہی اٹھاتے ہیں، اپنے گھر میں اپنی جیب سے باڑ لگوائی، اور گھر کے باہر سڑک کا کام بھی اپنے خرچ پر کرایا۔
واضح رہے کہ وزیر اعظم عمران خان نے اقوام متحدہ کی جنرل اسمبلی کے اجلاس میں تاریخی تقریر کی تھی، انھوں نے مؤثر طریقے سے کشمیر کا مقدمہ عالمی سطح پر پیش کیا، اور بتایا کہ بھارت جموں و کشمیر میں کس طرح ظلم ڈھا رہا ہے۔ انھوں نے تقریر میں دنیا میں پھیلی ہوئی اسلاموفوبیا پر بھی خاص طور سے بات کی۔