پاک فوج ایسا سبق سکھائے گی کہ مودی پوری زندگی یاد رکھے گا: شہباز شریف

لاہور: پاکستان مسلم لیگ ن کے صدر شہباز شریف نے کہا ہے کہ مودی کے اوچھے ہتھکنڈوں پر پاکستان نے صبر و تحمل کا مظاہرہ کیا، پاک فوج ایسا سبق سکھائے گی کہ مودی پوری زندگی یاد رکھے گا۔

تفصیلات کے مطابق اپوزیشن لیڈر شہباز شریف نے یوم سیاہ پر جلسے سے خطاب کرتے ہوئے کہا کہ مقبوضہ کشمیرکی داستان نہتے کشمیریوں کے خون سے بھری پڑی ہے، مقبوضہ وادی کو پاکستان نے آزاد کرانا ہے، وہ دن آئے گا جب ہم نواز شریف کی قیادت میں کشمیر فتح کریں گے۔

شہباز شریف کا کہنا تھا مودی سرکار نے ریاستی دہشت گردی کی بد ترین مثال قائم کی ہے، 27 اکتوبر 1947 کے بعد بھارت نے 5 اگست 2019 کو ایک اور وار کیا، دنیا کی تاریخ میں پہلی بار ایسا ہوا کہ مقبوضہ کشمیر کو جیل بنا دیا گیا، پوچھنا چاہتے ہیں کہ مقبوضہ کشمیر پر دنیا کا ضمیر کیوں سویا ہوا ہے۔

تازہ ترین:  وزیر اعظم عمران خان نے آزادیٔ کشمیر کا پیڑ لگا دیا

انھوں نے کہا مغربی دنیا کو آج مقبوضہ کشمیر کی کوئی پرواہ نہیں، آج کشمیریوں پر بھارتی مظالم کے خلاف پوری قوم متحد ہے۔ شہباز شریف وزیر اعظم پر بھی تنقید سے باز نہیں آئے کہا مودی امریکا جاتا ہے اور ٹرمپ کے ساتھ جلسہ کرتا ہے، عمران خان امریکا جا کر کہتے ہیں کہ میں جیلوں میں اے سی بند کردوں گا۔

یوم سیاہ کے جلسے میں حکومت پر تنقید کرتے ہوئے شہباز شریف نے کہا آج معیشت کو تباہ کر دیا گیا ہے، لوگ دال روٹی سے بھی محروم ہیں، آپ ملک سے باہر صلح اور اندر لڑائی کرا کر کشمیر فتح کرنا چاہتے ہیں، حکمرانوں سے کہتا ہوں دوغلی پالیسی نہیں چل سکتی۔

واضح رہے کہ آج جموں و کشمیر پر بھارت کے غاصبانہ قبضے کو 72 سال مکمل ہو گئے ہیں، پاکستان سمیت دنیا بھر میں کشمیری یوم سیاہ منا رہے ہیں۔