ایک سیٹ جیتنے والے بھی کہہ رہے ہیں استعفیٰ دیں، شوکت یوسفزئی

پشاور: وزیراطلاعات خیبرپختونخوا شوکت یوسفزئی نے کہا ہے کہ ایک سیٹ جیتنے والے بھی کہہ رہے ہیں استعفیٰ دیں۔

تفصیلات کے مطابق وزیر اطلاعات خیبرپختونخوا شوکت یوسفزئی نے میڈیا سے گفتگو کرتے ہوئے کہا کہ ایک سیٹ جیتنے والے بھی استعفیٰ کا مطالبہ کررہے ہیں، آپ نے کہا تھا دھاندلی ہوئی یہ نہیں کہا کہاں دھاندلی ہوئی ہے۔

انہوں نے کہا کہ فضل الرحمان پارلیمنٹ سے باہر چلے گئے اس پر تکلیف ہورہی ہے، ان کا ایک مقصد کشمیر کاز کو پیچھے دھکیلنا تھا جس میں وہ کامیاب ہوگئے۔

انہوں نے کہا کہ مولانا فضل الرحمان کا کام مودی کا خوش کرنا تھا، یہ تو کہتے تھے 15 لاکھ لوگ لے کر آئیں گے، ان سے پوچھیں کتنے لوگ لے کر آئے ہیں، معاہدے کی خلاف ورزی کریں گے تو ایکشن ہوگا۔

مزید پڑھیں: اسلام کی خدمت سب سے زیادہ وزیر اعظم عمران خان نے کی ہے، شوکت یوسفزئی

شوکت یوسفزئی نے کہا کہ مولانا کے دھرنے کا بڑا شور تھا، دھرنے کی کال کو عوام نے مسترد کردیا ہے، فضل الرحمان کے پاس کوئی ایجنڈا نہیں ہے تمام راستے کھول رہے ہیں۔

وزیر اطلاعات کے پی نے کہا کہ جلسے کے اخراجات (ن) لیگ برداشت کررہی ہے، فکر نہیں ہے جے یو آئی ایک مہینہ بیٹھے، معاہدہ توڑا تو سخت ردعمل ہوگا۔

شوکت یوسفزئی نے کہا کہ کراچی سے اس لیے زیادہ لوگ آئے کہ ٹرانسپورٹ مفت تھیں، جے یو آئی ڈرے اس وقت سے جب عمران خان کارکنوں کو کال دیں۔

انہوں نے کہا کہ جے یو آئی نے قیام پاکستان کی مخالفت کی تھی، اپوزیشن کرپشن بچانے کے لیے نکل پڑی ہے، فضل الرحمان نے کشمیر کاز کو پیچھے دھکیل دیا ہے، کشمیری ان کو بددعائے دے رہے ہیں۔