قیمتوں میں اضافہ، سوناعوام کی پہنچ سے مزید دور ہوگیا

کراچی: بلین مارکیٹ میں سونے کی فی اونس قیمت میں 9 ڈالر کا اضافہ ریکارڈ کیا گیا جس کی وجہ سے مقامی صرافہ بازاروں میں ایک بار پھر ریٹ بڑھ گئے۔

نمائندہ اے آر وائی نیوز انجم وہاب کے مطابق انٹرنیشنل مارکیٹ میں ٹریڈنگ کے دوران سونے کی فی اونس قیمت 9 ڈالر اضافے کے بعد دوبارہ 1580 ڈالر پر پہنچی، عالمی مارکیٹ میں اضافے کے اثرات مقامی صرافہ بازاروں پر بھی نظر آئے۔

آل پاکستان جیولرز ایسوسی ایشن کے چیئرمین محمد ارشد کے مطابق بین الاقوامی مارکیٹ میں اضافے کے بعد مقامی صرافہ بازاروں کی سونے کی فی تولہ اور دس گرام قیمت میں بالترتیب 450 اور 385 روپے اضافہ ریکارڈ کیا گیا۔

آج 30 جنوری 2020 کے ریٹ

فی تولہ: 91،500 

دس گرام : 78،446

حالیہ اضافے کے بعد سونے کی فی تولہ قیمت 91 ہزار 500 اور دس گرام 78 ہزار 446 روپے تک پہنچ گئی۔

کراچی، حیدرآباد، سکھر، ملتان، فیصل آباد، لاہور، اسلام آباد، راولپنڈی، پشاور اور کوئٹہ کی تمام صرافہ بازاروں میں سونے کے فی تولہ اور دس گرام کی خرید و فروخت نئے ریٹ کے ساتھ ہوئی۔