کراچی: کیٹگری سی ممالک سے آنے والے مسافروں کی جانب سے ٹیمپرڈ اور جعلی دستاویزات کے تحت پاکستان سفر کی کوششوں پر ڈائریکٹر ایئر ٹرانسپورٹ عرفان صابر نے تمام ایئرلائنز کو انتباہی مراسلہ ارسال کر دیا۔
مراسلہ کے مطابق کورونا کے باعث پاکستان نے ممالک کی درجہ بندی پر مبنی فہرست مرتب کی جس کے تحت کیٹگری سی ممالک سے مسافروں کی پاکستان آمد مجاز اتھارٹی کی اجازت سے مشروط ہے۔
مراسلہ میں ڈائریکٹر ایئرٹرانسپورٹ کا کہنا ہے کہ کچھ مسافروں نے ٹیمپرڈ اور جعلی استثنیٰ دستاویزات کے ذریعے پاکستان آنے کی کوشش کی، ان واقعات سے کورونا کے پھیلاوُ کے خلاف مہم کو نقصان پہنچنے کا خدشہ اور وائرس منتقلی کے سنگین خطرات کا امکان ہے۔
مراسلہ میں کہا گیا ہے کہ سنگین واقعات کا مجاز اتھارٹی نے سخت نوٹس لیا ہے کیٹگری سی ممالک کے مسافروں کو مجاز اتھارٹی کی جانب سے جاری اصل استثنیٰ دستاویزات پر فلائٹ میں سوار کرایا جائے۔
کیٹگری سی کے مسافروں کی پاکستان آمد کے لئے جاری استشنیٰ کی متعلقہ حکام سے تصدیق پر ہی متعلقہ دستاویزات قبول کئے جائیں گے، ٹیمپرڈ اور جعلی استثنیٰ کی حامل دستاویزات پر سفر کی صورت میں قانونی کارروائی کی جائے گی۔
سول ایوی ایشن اتھارٹی نے تمام آپریٹرز کو ہدایات پر عملدرآمد یقینی بنانی کی ہدایت کی ہے۔