کراچی: وزیراعلیٰ سندھ مراد علی شاہ نے سندھ کے 10 اضلاع میں 4 ارب کی لاگت سے گھروں میں سولر پینل لگانے کی منظوری دے دی۔
اے آر وائی نیوز کے مطابق وزیر اعلیٰ سندھ کی زیر صدارت سولر ہوم سسٹم کے حوالے سے اجلاس ہوا جس میں وزیر توانائی سندھ امتیاز شیخ، چیف سیکریٹری ممتاز شاہ ودیگر حکام نے شرکت کی۔
سولر ہوم سسٹم پراجیکٹ سے متعلق وزیر توانائی نے وزیر اعلیٰ سندھ کو بریفنگ دیتے ہوئے بتایا کہ منصوبہ خیرپور، سانگھڑ، بدین، گھوٹکی، جیکب آباد، کشمور، قمبر، شہداد کوٹ، تھرپارکر، سجاول، عمرکوٹ میں شروع کیا جارہا ہے۔
وزیر توانائی نے کہا کہ ہر ضلع میں بیس ہزار گھروں کو سولر سسٹم مہیا کیا جائے گا، سولر پینل کی 50 فیصد قیمت سندھ حکومت، بقیہ گھر والوں کو ادا کرنی ہوگی۔
انہوں نے کہا کہ یہ منصوبہ سانگھڑ، خیرپور میں فوری طور پر شروع کیا جائے گا، 10 اضلاع میں سولر ہوم سسٹم پروجیکٹ کا افتتاح آئندہ ماہ کیا جائے گا۔
ترجمان وزیر اعلیٰ سندھ نے بتایا کہ یہ پراجیکٹ ورلڈ بینک کے تعاون سے شروع کیا جارہا ہے۔
وزیراعلیٰ سندھ مراد علی شاہ نے ہدایت دیتے ہوئے کہا کہ پروجیکٹ سے غریب لوگوں کو اس لوڈشیڈنگ کے زمانے میں بجلی مہیا ہوسکے گی، سولر پینل ایسے لوگوں کو مہیا کیا جائے جن کے گھروں میں پہلے بجلی نہیں ہے، اور ان میں بھی ایسے گھروں کو ترجیح دی جائے جن کی سربراہ خواتین ہوں۔