ٹوکیو: ٹوکیو اولمپکس کے جیولن تھرو ایونٹ میں بھارت کو پہلا گولڈ میڈل جتوانے والے نیرج چوپڑا پر انعامات کی بارش ہوگئی ہے۔
بھارتی میڈیا رپورٹ کے مطابق پانی پت کے رہائشی نیرج چوپڑا کو حکومت ہریانہ نے چھ کروڑ روپے اور اول درجہ کی ملازمت بھی فراہم کرنے کا وعدہ کیا ہے۔
ہریانہ کے وزیر اعلیٰ منوہر لال کھٹر نے نیرج چوپڑا کو مبارک باد پیش کرتے ہوئے کہا کہ نیرج چوپڑا نے پورے ملک کا دل جیت لیا ہے، کھلاڑی نے نہ صرف تمغہ جیتا ہے بلکہ ملک کا دل بھی جیت لیا ہے، ملک کو اس لمحہ کا مدت طویل سے انتظار تھا، پورے ملک کو ان پر فخر ہے۔
وزیر اعلیٰ پنجاب کیپٹن امریندر سنگھ نے بھی نیرج کو ٹوکیو میں تاریخی کامیابی حاصل کرنے کے لئے مبارک باد پیش کی ہے، حکومت پنجاب نے اعلان کیا کہ نیرج کو دو کروڑ روپے سے نوازا جائے گا۔ وزیر اعلیٰ نے ٹوئٹ کیا، نیرج چوپڑا آپ نے تاریخ رقم کی ہے اور ملک کو فاخر بنا دیا ہے۔
بورڈ آف کنٹرول فار کرکٹ ان انڈیا (بی سی سی آئی) نے بھی نیرج چوپڑا کی کامیابی کی تعریف کی ہے، بی سی سی آئی نے نیرج چوپڑا کو ایک کروڑ روپے بطور انعام فراہم کرنے کا اعلان کیا ہے۔
یہ بھی پڑھیں: بھارتیوں نے مودی کو ’پنوتی‘ قرار دے دیا
آئی پی ایل ٹیم چنئی سپر کنگز نے بھی نیرج چوپڑا کو مبارک باد پیش کرتے ہوئے ایک کروڑ روپے فراہم کرنے کا اعلان کیا ہے، آنند مہیندرا نے کہا کہ وہ نیرج چوپڑا کو ہندوستان واپس لوٹنے پر ایک ایس یو وی سات سو کار تحفہ میں دیں گے۔
یاد رہے کہ حکومت ہریانہ کی جانب سے اولمپکس کے آغاز سے قبل ہی اعلان کیا گیا تھا کہ ہریانہ کا جو بھی کھلاڑی اولمپکس کا طلائی تمغہ جیت کر آئے گا اسے چھ کروڑ روپے بطور انعام فراہم کئے جائیں گے، نیرج کو اول درجہ کی ملازمت کے علاوہ پنچکولہ میں فلیٹ خریدنے پر بھی حکومت رعایت فراہم کرے گی۔