اسلام آباد: وزیر اعظم عمران خان کو سابق سری لنکن کپتان رانا ٹنگا کی جانب سے ایک خط موصول ہوا ہے، جس میں انھوں نے حالیہ افسوس ناک سیالکوٹ واقعے اور وزیر اعظم کی جانب سے اٹھائے گئے اقدامات پر جذباتی انداز میں بات کی ہے۔
سری لنکن ٹیم کے سابق کپتان اور سابق کابینہ وزیر ارجنا رانا ٹنگا نے عمران کو لکھے گئے خط میں کہا ہے کہ میں پریانتھا کمارا کو انصاف دلانے کی کوششوں کی ستائش کرتا ہوں، جیسا کہ آپ نے کہا کہ ایسے رویے کی سخت مذمت کی جانی چاہیے۔
انھوں نے لکھا یہ سمجھنا ضروری ہے کہ ایسی کارروائیاں چھوٹا سا حصہ کرتا ہے، چند لوگوں کے اعمال پر پوری قوم کو نہیں پرکھا جانا چاہیے، چند لوگوں کے اعمال پر پاک سری لنکا تعلقات کو نہیں پرکھا جانا چاہیے، ہماری دونوں قوموں کے درمیان رشتہ ہمیشہ مضبوطی اور یک جہتی کا رہا۔
سری لنکن ٹیم کو ایک معمولی سی ٹیم سے کرکٹ کی دنیا میں ایک اہم قوت بنانے والے سابق کپتان نے لکھا کہ جب سری لنکا مشکل کا شکار تھا تو پاکستان ہی تھا جس نے ہمارا ساتھ دیا، 1996 میں دیگر ممالک نے ورلڈ کپ میں شرکت کے لیے آنے سے انکار کیا تھا لیکن پاکستان نے مشکل وقت میں سری لنکا آ کر حمایت کا اظہار کیا۔ یاد رہے کہ سری لنکن ٹیم رانا ٹنگا کی قیادت میں 1996 کا ورلڈ کپ جیتا تھا۔
انھوں نے خط میں مزید لکھا کہ کرکٹ ہو یا سیاست، عمران خان چیلنجز کا سامنا کرنے میں غیر متزلزل رہے، خط میں مخاطب کرتے ہوئے رانا ٹنگا نے کہا جب سے آپ وزیر اعظم بنے ہیں متنازع مسائل کو احتیاط سے حل کر رہے ہیں، امید ہے آپ پاکستانی کمیونٹی کے چندگمراہ افراد کو سکھا سکیں گے کہ تمام انسان عزت کیے جانے کے مستحق ہیں۔
رانا ٹنگا نے لکھا جرم کے مرتکب افراد کو انصاف کے کٹہرے میں لانے پر میں آپ کا مشکور ہوں، ہم سری لنکن آپ کے اظہار کردہ جذبات کی صحیح معنوں میں قدر کرتے ہیں۔