کراچی: گورنر سندھ عمران اسماعیل نے آج ہفتے کو کراچی میں گرین لائن بس کے آغاز کے موقع پر خود بھی سفر کا لطف اٹھایا۔
تفصیلات کے مطابق گرین لائن بس سروس کے آغاز کے موقع پر گورنر سندھ عمران اسماعیل نے نمائش چورنگی بس اسٹیشن سے حیدری بس اسٹیشن تک کا بس میں سفر کیا۔
دل چسپ بات یہ ہے کہ گورنر سندھ نے بھی گرین لائن بس میں سفر کے لیے ٹکٹ خریدا اور اس کے بعد بس میں سوار ہوئے، اس موقع پر گرین لائن بس اسٹیشن میں موجود مسافروں نے گورنر سندھ کے ہمراہ تصاویر بھی لیں۔
گورنر سندھ نے گرین لائن بس اور اسٹیشن میں موجود سہولیات کا بغور جائزہ لیا اور اطمینان کا اظہار کیا، انھوں نے بس اسٹیشن میں موجود مسافروں سے سفری سہولیات سے متعلق بات چیت کی۔
انتظار کی گھڑیاں ختم: شہر قائد میں گرین لائن سفر کا آغاز
گرین لائن میں سفر کے دوران میڈیا سے بات چیت کرتے ہوئے انھوں نے کہا آج کا دن بہت خاص ہے کیوں کہ آج کرسمس، قائد کا یوم پیدائش اور گرین لائن منصوبے کی تکمیل کا دن ہے۔
گورنر سندھ نے کہا امید ہے جلد دیگر لائنز کا بھی آغاز ہوگا تاکہ کراچی میں ماس ٹرانزٹ سسٹم شروع ہو سکے، اس منصوبے کو تکمیل تک پہنچائیں گے، 14 سال سے کراچی کی عوام کو ایک بس سروس بھی فراہم نہیں کی گئی، آج الحمداللہ عوام اس سروس سے بہت خوش ہیں اور دعائیں دے رہے ہیں۔