لاہور: پیپلزپاڑٹی کے شریک چیئرمین اور سابق صدر آصف علی زرداری کا کہنا ہے کہ بھٹو کا رکن ہوں میں خریدو فروخت کی سیاست پر یقین نہیں رکھتا۔
اے آر وائی نیوز کے مطابق سابق صدر آصف زرداری سے پیپلزپارٹی کی پارلیمانی پارٹی کے ارکان کی حسن مرتضیٰ کی قیادت میں ملاقات ہوئی جس میں وزیراعلیٰ پنجاب کے انتخابات پر تبادلہ خیال کیا گیا۔
ملاقات میں متحدہ اپوزیشن کے امیدوار حمزہ شہبازکو بھرپورسپورٹ کرنے کا اعادہ کیا گیا۔
آصف زرداری نے ارکان سے گفتگو کرتے ہوئے کہا کہ ن لیگ کے ساتھ کھڑے ہیں ہم ن لیگ کے اتحادی ہیں اور تمام ذمہ داریوں کو قبول کرتے ہیں۔
انہوں نے کہا کہ وزیراعلیٰ پنجاب کا امیدوار حسن مرتضیٰ ہوتا تو میں پیسے ضرور لگاتا لیکن حمزہ شہباز کے وزارت اعلیٰ کے امیدوار ہونے پر میں پیسہ کیوں لگاؤں؟
سابق صدر کا کہنا تھا کہ ملک اور پنجاب کی سیاسی صورت حال پر مفاہمت کے لیے خود کو پیش کیا ہے پہلی بار لاہور نہیں آیا میں مفاہمت کی سیاست پر یقین رکھتا ہوں اور یہ کرتا رہوں گا۔
آصف زرداری نے کہا کہ تین ماہ پہلے اعلان کیا تھا کہ میں پنجاب میں بیٹھ کر سیاست کروں گا ابھی تو میں نے پنجاب کی ہر تحصیل میں جانا ہے لیکن پیسے کی سیاست کو یکسر مسترد کرتا ہوں۔