پاکستان سپر لیگ میں شریک ٹیموں اور میچ آفیشلز کو اسٹیٹ گیسٹ کا درجہ دے دیا گیا ہے جب کہ غیر ملکی کمنٹیٹرز، عمائدین اور پروڈکشن اسٹاف کو وی آئی پی کا درجہ دیا گیا ہے۔
دنیا کی مقبول لیگ پاکستان سپر لیگ سیزن 8 کا آغاز 13 فروری کو ملتان میں ہو رہا ہے۔ ملک کے تین بڑے شہروں کراچی، لاہور اور ملتان میں کھیلے جانے والے اس ایونٹ کی تیاریاں آخری مراحل میں داخل ہوچکی ہیں جب کہ سیکیورٹی کے انتظامات کو بھی تقریباً مکمل کر لیا گیا ہے۔
پاکستان سپر لیگ میں شریک تمام ٹیموں اور ان کے میچ آفیشلز کو اسٹیٹ گیسٹ کا درجہ دے دیا گیا ہے۔ اس کے ساتھ ہی غیر ملکی کمنٹیٹرز، عمائدین اور پروڈکشن اسٹاف کو بھی وی آئی پی مہمان کا درجہ دیا گیا ہے۔
پی ایس ایل کے فول پروف سیکیورٹی انتظامات کے لیے محکمہ داخلہ پنجاب نے آئی جی پنجاب، ایڈیشل آئی جی آپریشن پنجاب، سی سی پی او لاہور سمیت راولپنڈی، ملتان کے ریجنل و سٹی پولیس افسران کو مراسلہ ارسال کردیا ہے جس میں کہا گیا ہے سیکورٹی حصار تشکیل دیکر سخت ترین حفاظتی انتظامات یقینی بنائے جائیں۔
انٹیلیجنس ایجنسیوں، فوج اور رینجرز کے ساتھ کوارڈینیشن رکھ کر کھلاڑیوں اور آفیشلز کو ایئرپورٹ اور اسٹیڈیم کے درمیان قیام اور نقل و حرکت کے دوران بھی فول پروف سیکیورٹی فراہم کی جائے۔
مراسلے میں متعلقہ حکام کو ہدایت کی گئی ہے کہ راولپنڈی، لاہور اور ملتان میں داخل ہونے والی بسوں اور ٹرکوں سمیت تمام گاڑیوں کی مکمل چیکنگ کی جائے، پولیس اور سیکیورٹی اہلکار ڈیوٹی کے دوران اپنے نام کے ٹیگ وسیکیورٹی کارڈ لازمی رکھیں۔ ورکشاپس، پیٹرول پمپس، بس اسٹاپ، بس اور ٹرک اڈوں پارکنگ اسٹینڈز، پبلک پارکنگ ایریاز، پارکنگ پلازہ اور دیگر ایسی جگہوں کی مکمل اسکریننگ کی جائے۔
یہ بھی پڑھیں: نسیم شاہ شادی کب کریں گے؟ پیسر نے بتا دیا
مراسلے میں مزید کہا گیا ہے کہ کسی بھی ناخوشگوار صورتحال کی صورت میں نمٹنے اور کراؤڈ کو کنٹرول کرنے کی خاطر مختلف مقامات پر اینٹی رائٹس فورس تعینات رکھی جائے اور ٹورنامنٹ کے دوران ٹریفک کو رواں دواں رکھنے کے لیے بھی خصوصی انتظامات یقینی بنائیں جائیں۔