صدر مملکت ڈاکٹر عارف علوی کو یوکرینی ہم منصب ولادیمیر زیلنسکی نے ٹیلیفون کیا جس میں سیاسی اور اقتصادی تعلقات پر بات چیت کی گئی۔
اے آر وائی نیوز کے مطابق صدر مملکت ڈاکٹر عارف علوی کو یوکرین کے صدر ولادیمیر زیلنسکی نے ٹیلیفون کیا جس میں سیاسی اور اقتصادی تعلقات پر بات چیت کی گئی اور روس یوکرین جنگ میں دنیا کو درپیش مسائل پر تبادلہ خیال کیا گیا۔
اس موقع پر دونوں ممالک کی جانب سے مشترکہ مفاد کیلئے اقتصادی اور تجارتی تعلقات کو بڑھانے کی ضرورت پر زور دیا گیا، صدر زیلنسکی نے صدر علوی کو اپنے دس نکاتی امن فارمولے کا حوالہ دیتے ہوئے روس، یوکرین جنگ کے خاتمے کیلئے یو این جنرل اسمبلی میں پیش کی جانے والی قرارداد کے مسودے پر پاکستان کی حمایت کی درخواست کی۔
صدر عارف علوی نے اپنی گفتگو میں کہا کہ روس، یوکرین جنگ پر پاکستان کو گہری تشویش ہے، پاکستان اقوام متحدہ کے چارٹر کے مطابق جنگ کے پرامن حل کی حمایت کرتا ہے، حکومت پاکستان کی طرف سے مجوزہ قرارداد کے مندرجات کا جائزہ بھی لیا جا رہا ہے۔