چند ماہ کے دوران حادثاتی طور پر مرنے والے دو بچوں کی ماں دلبرداشتہ ہوگئی، اپنے بچوں کی پے در پے موت کے بعد ماں نے صبر کا دامن چھوڑتے ہوئے نانی کو گرفتار کرنے کا مطالبہ کردیا۔
تفصیلات کے مطابق امریکی ریاست فلوریڈا میں دو بچوں کی علیحدہ علیحدہ حادثات میں ہونے والی اموات نے بچوں کی والدہ کو بہت بری طرح پریشان کردیا کیونکہ مذکورہ دونوں بچے اپنی نانی کی نگہداشت میں تھے۔
اس حوالے سے غیر ملکی خبر رساں ادارے کی رپورٹ کے مطابق اس دل دہلا دینے والی کہانی کی مرکزی کردار کائیلا نکس اور ان کی والدہ 65 سالہ ٹریسی نکس ہیں۔
دسمبر2021 میں کائیلا کا 16 ماہ کا بیٹا ایذرا فلوریڈا کے تالاب میں اس وقت ڈوب گیا جب اس کی نانی ٹریسی نکس تالاب کے کنارے سو رہی تھی، بچے کی موت کو حادثاتی قرار دیا گیا تھا۔
اس واقعے کے تقریباً ایک سال بعد نومبر2022میں ٹریسی اپنی 7 ماہ کی نواسی یوریل کے ساتھ تھی کہ اس نے بچی کو گاڑی کی پچھلی سیٹ پر لٹا دیا اور خود کہیں چلی گئی، گاڑی کے تمام شیشے بند ہونے کے باعث 7 ماہ کی بچی دم گھٹنے سے ہلاک ہوگئی۔
بعد ازاں ٹریسی نے بتایا کہ وہ شیر خوار بچی کے بارے میں بھول گئی تھیں، میڈیا سے گفتگو کرتے ہوئے بچوں کی ماں کائیلا نکس نے کہا کہ آپ ایک چھوٹی بچی کو کیسے بھول سکتے ہیں؟ اس جرم کی پاداش میں میری ماں کو سلاخوں کے پیچھے ہونا چاہیے۔
کائیلا کا کہنا تھا کہ یہ بات مجھے بہت تکیلف دیتی ہے کہ میں اس کی بیٹی ہوں، چاہے وہ میری ماں ہی سہی لیکن اس وقت اسے جیل کے اندر ہونا چاہیئے۔