اسلام آباد: وفاقی وزیر اطلاعات و نشریات مریم اورنگزیب نے وزیراعظم شہباز شریف کے اعتماد کا ووٹ لینے کی خبروں کی تردید کر دی۔
سماجی رابطے کی ویب سائٹ ٹوئٹر پر جاری اپنے بیان میں وزیر اطلاعات مریم اورنگزیب نے بتایا کہ وزیراعظم شہباز شریف نے قومی اسمبلی سے اعتماد کا ووٹ لینے کا فیصلہ نہیں کیا۔
مریم اورنگزیب نے بتایا کہ ایوان سے اعتماد کے ووٹ کی مشاورت ہوئی نہ ہی اس کی ضرورت ہے، شہباز شریف 11 اپریل 2022 کو قائد ایوان کا ووٹ لے چکے ہیں۔ ساتھ ہی انہوں نے یہ بھی واضح کیا کہ من گھڑت افواہ حقیقت نہیں۔
وزیراعظم نے اعتماد کا ووٹ لینے کا فیصلہ نہیں کیا،ایسی مشاورت ہوئی نہ اس کی ضرورت ہے۔ عوام، پارٹی،اتحادی جماعتوں کے متفقہ امیدوار شہباز شریف 11 اپریل 2022 کو قومی اسمبلی کے قائد ایوان کا ووٹ لے چکے ہیں۔ من گھڑت افواہ حقیقت نہیں۔ میڈیا بغیر تصدیق وزیراعظم سے متعلق خبریں نہ چلائے
— Marriyum Aurangzeb (@Marriyum_A) April 24, 2023
اے آر وائی نیوز کو ذرائع نے بتایا ہے کہ وزیراعظم شہباز شریف نے قومی اسمبلی سے اعتماد کا ووٹ لینے کا فیصلہ کیا ہے۔ وہ 27 اپریل کو اعتماد کا ووٹ حاصل کریں گے۔
وزیراعظم نے اس متعلق سابق وزیراعظم اور مسلم لیگ (ن) کے قائد نواز شریف و دیگر رہنماؤں سے مشاورت کر لی ہے۔ شہباز شریف نے اتحادی جماعتوں کے تمام ارکان قومی اسمبلی کو اسلام آباد میں موجودگی یقینی بنانے کی ہدایت دے دی۔