اسلام آباد : پی ٹی آئی نے خواجہ آصف کو10ارب ہرجانے کا نوٹس بھیج دیا ، جس میں کہا ہے کہ خواجہ آصف اپنے بے بنیاد الزام پر عمران خان سے تحریری معذرت کریں۔
تفصیلات کے مطابق پی ٹی آئی چیئرمین عمران خان پر ٹکٹوں کی فروخت کے الزام میں پی ٹی آئی نے خواجہ آصف کو10ارب ہر جانے کا نوٹس بھیج دیا۔
نوٹس پی ٹی آئی رہنماعثمان ڈار کی جانب سے بھیجا گیا، جس میں کہا گیا ہے کہ خواجہ آصف نے عمران خان پر سیالکوٹ میں ٹکٹوں کی فروخت کا جھوٹا الزام عائد کیا، ٹکٹوں کے عوض سیالکوٹ سے 30 کروڑ روپیہ اکٹھا کرنے کا من گھڑت الزام لگایا گیا۔
نوٹس میں کہنا تھا کہ خواجہ آصف نے سیالکوٹ کے ٹکٹ ہولڈرز پر بے بنیاد اور سنگین الزام عائد کیا، براہ راست پریس کانفرنس میں عمران خان اور پارٹی رہنماؤں پر بہتان تراشی کی گئی۔
نوٹس میں کہا گیا کہ خواجہ آصف اپنے بے بنیاد الزام پر عمران خان سے تحریری معذرت کریں، ملک کے معروف اخبارات میں معذرت نامہ شائع کروائیں، معافی نہ مانگنے کی صورت میں 10 ارب روپیہ ہرجانہ ادا کریں، معافی یا ہرجانہ کی عدم ادائیگی پر قانونی کارروائی کی جائے گی۔