سندھ میں بلدیاتی انتخابات کے معاملے پر الیکشن کمیشن نے کہا ہے کہ آزاد امیدوار 7 دن کے اندر سیاسی جماعت میں شمولیت اختیار کر سکتا ہے۔
الیکشن کمیشن کے مطابق آزاد امیدوار چاہے تو 24 مئی تک کسی بھی سیاسی جماعت میں شامل ہو سکتا ہے اس سلسلے میں آزاد امیدوار کو ایک حلف نامہ بھی جمع کرانا ہو گا۔
آزادامیدوار کو واضح کرنا ہو گا کہ وہ کسی دباؤ میں نہیں ہے اور اسے واضح کرنا ہو گا کہ رضاکارانہ سیاسی جماعت میں شامل ہو رہا ہے۔
الیکشن کمیشن کے مطابق آزادامیدوار کو تصدیق شدہ حلف نامہ آراو کے پاس جمع کرانا ہو گا۔
الیکشن کمیشن سندھ کا کہنا ہے کہ 22 مئی کو یوسیز کے چیئرمین، وائس چیئرمین اور وارڈ ممبرز حلف اٹھائیں گے جس کے بعد کے ایم سی کا ایوان مکمل ہوگا۔
الیکشن کمیشن سندھ کا کہنا ہے کہ کراچی کو کاسموپولیٹن کارپوریشن کا درجہ دیا گیا ہے اور کراچی کے ایوان کے کل منتخب ارکان کی تعداد 246 ہے تاہم 9 نشستوں پر مختلف عدالتوں، الیکشن کمیشن کی جانب سے نتائج روکے گئے ہیں۔
ترجمان الیکشن کمیشن سندھ کا کہنا ہے کہ کراچی میں پیپلزپارٹی، جماعت اسلامی، پی ٹی آئی بالترتیب بڑی جماعتیں بن کر سامنے آئی ہیں۔
علاوہ ازیں الیکشن کمیشن نے سندھ میں بلدیاتی نظام کے اگلے مراحل کا شیڈول بھی جاری کردیا ہے۔
شیڈول کے مطابق ٹاؤن چیئرمین، وائس چیئرمین کے لیے کاغذات نامزدگی 22 سے 24 مئی تک جمع ہوں گے اور 25 سے 26 مئی تک کاغذات نامزدگی کی جانچ پڑتال ہوگی۔
الیکشن کمیشن کا کہنا ہے کہ 3 سے 4 جون تک ٹاؤن کونسل، سٹی کونسل کے ایوان کی تشکیل مکمل کی جائے گی اور 10 جون کو منتخب ہونے والے بلدیاتی نمائندے حلف اٹھائیں گے۔