میٹا کمپنی کی ملکیت واٹس ایپ نے صارفین کے لئے مزید دلچسپ فیچرز متعارف کراتے ہوئے ان کے دل جیت لئے ہیں۔
غیر ملکی میڈیا رپورٹ کے مطابق ان نئے فیچرز کا اعلان خود ‘میٹا’ کے بانی مارک زکر برگ نے پیر کو اپنے فیس بک اکاؤنٹ پر کیا۔
مارک زکر برگ نے اپنی بلاگ پوسٹ میں لکھا کہ ہم آپ کے پیغامات کو نجی اور محفوظ رکھنے کے لیے نئے طریقے تلاش کرنے کا جذبہ رکھتے ہیں، آج ہم صارفین کے لیے چیٹ لاک کا نیا فیچر متعارف کراتے ہوئے نہایت پرجوش ہیں۔
چیٹ لاک فیچر کے ذریعے صارفین واٹس ایپ پر کی جانے والی گفتگو کو لاک کرکے اس پر پاس ورڈ یا فنگر پرنٹ کی مدد سے محفوظ کرسکتے ہیں۔
یہ بھی پڑھیں: واٹس ایپ: چیٹ پر لاک لگانے سمیت کئی نئے فیچرز کا تجربہ
چیٹ لاک کرنے کی صورت میں واٹس ایپ پر ہی ایک الگ فولڈر بن جائے گا جس میں وہ تمام چیٹس موجود ہوں گی جن پر صارفین لاک لگائیں گے۔
واٹس ایپ کے مطابق صارفین جن چیٹس پر لاک لگائیں گے موبائل پراس کے نوٹی فکیشن بھی اسکرین پر نمایاں نہیں ہوں گے، چیٹ کو لاک کرنے کے لیے صارف کو اپنے چیٹ روم میں اس شخص کی چیٹ کو ٹیپ کرکے لاک کے آپشن پر کلک کرنا ہوگا۔
کمپنی کا کہنا ہے کہ یہ فیچر ان تمام لوگوں کے لیے بہتر ہو گا جن کا فون اکثر ان کے اہلِ خانہ یا دوستوں کے پاس ہوتا ہے۔