بھارت میں مسافر ٹرین کے پٹری سے اترنے اور مال گاڑی سے ٹکرانے کے نتیجے میں کم از کم 50 افراد ہلاک اور سیکڑوں کو ہسپتال لے جایا گیا ہے۔
بین الاقوامی میڈیا رپورٹس کے مطابق مشرقی ریاست اڈیشہ کے ضلع بالاسور میں تقریباً 500 پولیس افسران اور 75 ایمبولینسوں کو جائے حادثہ پر بھیجا گیا ہے۔
ہندوستان کے وزیر اعظم نریندر مودی نے کہا ہے کہ وہ حادثے سے "پریشان” ہیں اور متاثرہ افراد کی "ہر ممکن مدد” کی جا رہی ہے دکھ کی اس گھڑی میں میری ہمدردیاں سوگوار خاندانوں کے ساتھ ہیں۔
ریلوے کے وزیر نے ٹوئٹر پر جاری پیغام میں لکھا کہ حادثے کی جگہ پر امدادی کارروائیاں جاری ہیں اور متاثرہ افراد کو ہر ممکن مدد فراہم کی جا رہی ہے۔
ریاست کی فائر سروسز کے ڈائریکٹر جنرل سدھانشو سارنگی کے مطابق حادثے میں کم از کم 400 افراد زخمی ہوئے ہیں جب کہ درجنوں ملبے تلے دبے ہیں۔
مقامی رپورٹس کے مطابق کورومنڈیل ایکسپریس، جو مشرق میں کولکتہ سے جنوبی ہندوستان کے چنئی تک چلتی ہے وہ ڈی ریل ہو کر مخالف ٹریک پر گر گئی۔