کراچی : محکمہ موسمیات نے موسمیاتی تبدیلی کے اثرات کے حوالے سے کہا کہ مئی میں معمول سے 127 فیصد زائد بارش ہوئیں اور درجہ حرارت میں ایک فیصد کمی ریکارڈ کی گئی۔
تفصیلات کے مطابق موسمیاتی تبدیلی کے پاکستان پر اثرات سامنے آنے لگے، محکمہ موسمیات کی جانب سے کہا گیا ہے کہ مئی میں ملک میں معمول سے ایک سوستائیس فیصد زائد بارش ہوئی۔
ایک دن میں سب سے زیادہ اسّی ملی میٹر بارش پنجاب کے ضلع حافظ آباد میں پانچ مئی کو ہوئی جبکہ مئی میں دن کا درجہ حرارت معمول کے اوسط سے تقریباً ایک ڈگری سینٹی گریڈ کم رہا۔
زیادہ تر زرعی علاقوں میں معول سے زیادہ بارش، آندھی اور ژالہ باری بھی رپورٹ ہوئی، رپورٹ کے مطابق پھلوں اور سبزیوں کی فصلوں کو نقصان پہنچا۔
خیال رہے پاکستان پھر غیرمعمولی موسمی صورتحال کے گھیرے میں ہیں ، رواں سال اپریل اور مئی میں اوسط سے نہ صرف کم گرمی پڑی ہے بلکہ بارش اور ژالہ باری بھی جاری رہی۔
ماہرین اسے ماحولیاتی تبدیلی کے اثرات اور فصلوں کے لیے خطرناک قرار دے رہے ہیں، ڈی جی میٹ سردار سرفراز کا کہنا ہتھا کہ گرمیوں میں بالخصوص مئی میں ژالہ باری مغربی ہواوں کی وجہ سے ہے، مغربی ہواؤں کے باعث پانی کے قطرے اولے کی صورت اختیار کرتے ہیں اور بادل ان کا بوجھ نہیں اٹھا پاتے۔
ماہرین کے مطابق انیس سو ستاسی کے بعد مئی میں ریکارڈ کی جانی والی بارش اوسط سے زیادہ ہوئی اور مغربی ہواؤں ہی کی وجہ سے شمالی علاقوں میں اپریل اورمئی میں برف باری بھی ریکارڈ کی گئی ہے۔